الاثنين، 31 ديسمبر 2012

2012

كنت بحاول اكتب عن العام الجديد او العام القديم بطريقة ايه الى حصل وايه الى بتمنى انو يحصل لكن لما بصيت لنفسى وللى حصلى طول السنه الى فاتت عرفت انها كانت سنة شوم فعلا كل حاجه فيها كانت وحشة الا بصيص من شوية امل على فرح ودول الى خلو الحياه تستمر لكن فى النهاية انا معاكم وبكتب بالدموع والدم كل اللحظات الحلوة والوحشة الى مريت بيها وكم الاحباط والضغوط الى زادت السنه دى والى متعود انها تزيد كل سنه عن التانية كل الى حصل فيها بمراااااااااااااااااارها وحلوها
طول السنه دى ومن اولها فى بالى حاجه واحده بس وهى " احداث القديسين "  " وموت " خالد سعيد " " احداث محمد محمود " يعنى من الاخل قلبى طول الفترة الى فاتت كان فى الكس حقيقى الحدثين دول غيرو حياتى بطريقة مختلفة جدا ممكن يكونه هما دول الى خلونى فعلا اكسر فكرتى طول الفترة الى فاتت انى مبخافش الى حصل معايا فى محمد محمود لوحده بعتبره عام يعنى ايه دم واحد مات يكون بيسيل عليك وانتا شايله شريط حياته بيمر قدامك كان بيحب مين وكان عايش مع مين تاثيرات وشو اصحابه لما يشوفوه فى تابوت او علاقته بعائلته قبل ما ينزل الميدان اكيد امه ماكانتش عاوزاه يروح المكان ده او حبيبته لسه قافله معاه قبل ما الطلقه تخترق صدرة وكان بيطمنها عليه حياته كان عايشها ازاى يا ترى كان عارف ان نهايته حتخلص وان ناس غرب حيشيلوه او ان واحد من اسوان ممكن يكون هو الى بيجرى بيه لاقرب مستشفى ميدانى هو كل تفكيره انه بس فى غيبوبة ولسه مماتش كل ده بيمر فى بالى وانا شايل واحد معرفهوش ودمه بيسيل على هدومى كان كل نفسى انه يطلع اى احساس بالمكان او حتى يطلع صرخة تبينلى انه لسه عايش .
اما احداث القديسين فكانه من بشاعه الموقف انى اشوف جلد بشرى على شجرة يا ترى ده جلد مين فى الى ماته يا ترى اهل الشخص ده او هو شخصيا كان متخيل ان ممكن حياته تنتهى وانه اصلا ميبقاش ليه حتى جسد وان قبره يعتبر مجرد شاهد بس على موته لكن جسده حتى مستناش لحد ما يتخل تحت التربه عشان يتحلل واتحلل من الهواء بشاعة التفجير وان لحد دلوقتى محدش اتحاكم بجد فى كل الى حصل ده ودم كل الناس الى راحت فى ليله احتفال بعيد يا ترى كل سنه جديد حيفرحوه ولا حيفتكرو عيدهم يا ترى حيروحو الكنيسة ولا حيروحو المقابر بشاعة ارتباط يوم الفراق بيوم العيد دى هي الماساه بعينها .
اما على الصعيد الشخصى : ففى السنه دى بالتحديد شخصيتى اتغيرت تغير تام من بدايه طريقة نظريتى للامور ونشاطى الى خف وطريقة حياتى وده كان ليه اسباب كتيرة زى مثلا دخولى الجيش وكمان قرايتى الكتيرة اى نعم هيا كانت لروايات وحجات زى دى لكن فى الواقع كانت مثمرة شوية تانى حاجه خسرتها مش عارف خسرتها ولا كسبتها او انها كانت خساره سلبيه او ايجابية هى خالد عوض الصديق الى عشنا مع بعض اكثر من 7 سنين وبعد كده قررنا نختلف ونسيب بعض واحنا مش فى قلوبنا حاجه من بعض لكن زى ما بيحصل معايا كتييير وده من فضل رب السماء انه لما بيسحب منى حد بيعوضه بحد تانى يمكن تعويض خالد لسه محسيتش بيه من بين الناس لان اتضاف لقائمة اصدقائى ناس كتير زى حس وغيرهم او كمان زيادة صداقتى باسماء بنت الشاطر وكمان من الحجات الى غيرتنى للأسوء كانت دخولى الجيش الى مش عاوز اتكلم عنه كتير عشان مش عاوز افتكره بعد ما اخلصه
واخر حاجه حصلت لى فى السنه دى ان اصحاب جداد عرفو بعد حيانى 22 سنه ان لايا اسم تانى هو آيــــــــه وده مش حيضرنى فى شئ ولا حيفيدنى ولان الموضوع بالنسبالى عادى مشفتش انه كان فى حاجه لازم يعرفوها اول اما اتعرفنا على بعض
كمان بشكر كل الى وقف معايا طول السنه دى عشان اتخلص من عقدة " حبى " ل " اسراء "  خالد وامى واسماء وامنية بنت خلتى

الثلاثاء، 27 نوفمبر 2012

الـــتـــدخل الــدولـــــى " يععععععععع "


التصعيد الدولى :
كلمه مخيفه عند كل المصريين والمعروف عنها انها حتخلى الامريكان يعملو تغيير اقامه فى السجل المدنى ويجو يسكنو عندينا ويشتغلو فى الكهرباء والميا ويلغو ابناء العاملين فيهم وحيغيرو الزى المدرسى ويخلو الولاد بالشورتات والبنات بالميكرو جيب ( يلا بينا انا اول واحد حطالب بيها ) يعينى عيالنا حيتنفخو فى البرد .
بوصو بقى مصر بلدنا بنت الوسخه والعرص الى كان بيحكمها قبل كده هما الى حطو البلد فى المكان ده بابا مبارك كان بيحب يتعنطز ببلدو بره بين باقى الدول فكل اما تتعمل اتفاقيه دوليه جديده نلاقى الباشة جرى وراح يمضى ويبصم ويختم من غير ما يقرى حته (يا راجل انا حفر البلد ورقه ورقه ) عشان يبقى هو اول بلد عربية وقعت على حاجه زى دى ويثبت للعالم ان مصر هى الصوره الكامله للديموقراطيه فى افريقيا والدول العربية ( طبعا من بره هلا لا ومن جوا يعلم اهلها والله ) المهم دى كانت الصوره الى بيحب يصدرها ابو علاء لعزبته بره ان الدنيا شفتشى وكل حاجه بونو لما مصر انضمت لمنظمه الامم المتحده بقت مجبره على المحافظة على حاجه اسمها السلم العالمى وبعد توقيع مصر على ميثاق الامم المتحده لحقوق الانسان الزمت انها تحافظ على حقوق الانسان فى كل العالم وقبلهم كلهم فى بلدها يعنى من حق اى مواطن انو لو ملقاش الحكومة بتجيبلو حقه فى بلدو او لقى تدخل من الحكومه او من اصحاب السلطه والسياسه فى بلدو من حقه انه يلجا للمحكمه الدوليه بس قبل كده لازم يمر بخطوات والخطوات دى هى الى بتبقى العائق الى بتستخدمه الدوله عشان متخليش اى حد يطلب بالتحكيم الدولى او التصعيد الدولى لازم فى البدايه تكون استنفذت كل الطرق الشرعيه جوه بلدك يعنى رفعت قضيه واخدت استاناف وبعد كده نقد وبعد كده تلجا لحاجه اسمها المحكمه الاقايمية ولاننا فى افريقيا ف المحكمة الاقليمية بتاعتنا فى جنوب افريقيا بعد ما المحكمه الاقليمية تحكم ضدك بردو تروح للمحكمه الدولية طبعا انتا عشان تمر بده كله يكون عيالك بيتابعو مع المحامى :) المهم مين الى طالب او طلت عنهم اشاعه انهم بيطالبو بالتدخل الخارجى الىعمرو مكان عيب لان مصر موقعه على الاتفاقيات دى مش فاكر منهم غير الراجل الى اشترى من الدوله اراضى كتير فى سينا وراحت الدوله استحوزت على الاراضى تانى ومرجعتلوش فلوسه وكمان احنا النوبيين الى طلعت علينا الاشاعه دى زمان كنت اتمنى انها تكون حقيقه عشان ناخد حقنا بجد كمان من الى طالبو بكده قبل الثوره كانو الاخوان المسلمين لما معظم اعضائهم المرشحين فى مجلس الشعب فى 2010 سقطو فى الانتخابات وكمان الخبر الى طلع ان البرادعى طالب بالتصعيد الخارجى للتدخل فى حل الازمة الحاليه فى مصر 

الأحد، 25 نوفمبر 2012

اليوم العالمي للقضاء علي العنف ضد المرأة

انهردة 25 نوفمبر ,, اليوم العالمي للقضاء علي العنف ضد المرأة

العنف ضد المراه بالاساس هو السائد فى الوطن العربى كله مش شرط ان يكون العنف بالضرب او 

بالتعذيب العنف ليه صور كتير خصوصا ضد كائن حساس زى المراه الى ديما الراجل منا بيحاول انه 

يبين قوته وشدته بانه يجبرها على فعل حاجه هى رفضاها ده فى حد زاته يعتبر عنف 

لما تجبر بنتك على انها تلبس لبس معيا او تتخل كليه محدده او حتى تتجوز راجل معيا ده فى حد 

زاته عنف 


لما تكون فى صف المجتمع الجاهل الى بيحط المراه فى قوالب جاهزة معده مسبقا ده يبقى عنف 

لكن ايه هيا اسباب العنف ده للاسف فى اغلب الاحيان بيكون العنف ده ناتج عن قصور فى شخصية 

الرجل زى ما قلت فوق انو بيحاول يبين شدته او على الاقل يبقنع نفسو بانه قوى او كلمته بتتسمع 

للاسف دى كلها بتبقى ناتجه عن عقد نقص عند الشخص المعتدى 

او ممكن يكون كمان خوف خوف من ان البنت دى تكون اعظم منه او احسن منه فى حجات كتيره 

فى التعليم وفى الحياه وفى طريقة تفكيرها وده كمان يندرج تحت بند النقص 


فى النهايه ومن وجهة نظرى الشخصيه ان اسباب العنف بمختلف طرقه سببها مرض نفسى بيكون 

مريض بيه المعتدى 

بـــــــوش


"حتى وان عشت وحيدا فى الحياه فعلم انه لن ينال منك الاكتئاب "
بوش عادل (اوكا)
قعدين فى مكتب المتر عبد الرحيم انا والريان كما كانت تجرى العاده الريان يطلع ويرجعلنا ببوش ولد هادى فحت سلم علينا كلنا وقعد الريان عرفو عليا وقالى يا احمد اى نشاط خد معاك بوش ( مقتنع بالبرادعى وحيشتغل معانا فى الحمله ) الصرخة كانت فى انو اول مسيحى اشوفو عندو استعداد انو يشتغل فى السياسة بجد اينعم كانت بعد الثورة بس بوش كسر جوايا الحاجز ده واستمر صمت بوش طول اللقاء الاول والى لقائات تانية بعد كده نزلنا نلزق بوستر دعايا للرادعى بعد الثورة وبوش مظهرش بس الى ظهر بولا اخوه الكبير بولا كمان كان نشيط بس بوش كان وراه شغل
بوش شخص صامت طول الوقت بيسمع اكتر ما بيتكلم عنده حب معرفة ده غير كم المعلومات الى عندو هو الوحيد الى فى نظرى مؤمن بقواعد وقوانين الليبرالية الحق من الاخر دماغ بوش دماغ مكلفة مكلفة كتب كتيرة من روايت لكتب سياسية لعلوم حياتية
اما عن الجانب العاطفى لبوش وده الغريب بوش هو الوحيد الى فى الشلة الى ممرش بتجربة عاطفية حتى الان وده هو الغريب فى امره يمكن لان دماغه الى اكبر من سنه بكتير هى الى مخلياه كده مش عجباه اى بنت او لان هو حاطط مقايسس مبتتواجدش فى اى بنت نادرا او لان مفيش بنات يدينون بالمسيحية ممكن تعجبهم شخصية بوش عشان بعد المسيحيين طول الفتره السابقة من السياسة
او يمكن بوش مبيعرفش يقييم احاسيسة اتجاه الاخرين
من يومين كنت مع بوش زى ما جرت العادة اننا ننزل مع بعض طول ما انا فى اسوان وانا فى الطريق كنت عارف ان مرسي بيقول خطاب مهم بس كنت بحاول ان محدش يعرف عشان الخروجة متبوظش وكانى كنت حاسس ان الاجرائات الى حياخدها مرسى حتكون بشعة بس مكنتش عارف انها حتكون بالبشاعة دى كمت بوش فى سرو وقلتله يفتح النت من موبيلو ويشوفلنا مرسى قال ايه فى خطابه لكن هو مقدرش ولما وصلنا للكفاتريا الى بنقعد فيها فتحنا اللاب وقرينا الاعلان الدستورى الى مرسى نزلو وبوش بقى كانه ماتله واحد  دخل فى كوخ الصمت الى بيقعد يفكر فيه وبوظ علينا الخروجة 

الجمعة، 23 نوفمبر 2012

مصر ..... البلد الى ملهاش عدل

بالصلاه على النبى والله العظيم انا مسلم :)
العنوان انهرده مصر الى ملهاش عدل مش معنى ده انها ملهاش عدل فى الجواز لا مصر طول عمرها متجوزه ومن راجل للراجل اينعم الرجاله بيطولو الا اخر جوازه الى شكلها مش حتدوم مصر كمان ولاده وعمرها معانت من مشاكل فى الحمل او حتى فى الطلق وطول عمرها بتولدهم طبيعى عمرها ما لجئت للقيصرى 
المره دى حتكلم عن المختلف فى الشعب بتاعنا او المختلف فى بلدنا الى فعلا ملهاش عدل لازم طول عمرها تفضل مقلوبه كده طول عمرها حتى فى الخريطه النيل فى كل حته بيبدا متفرع ويتجمع عند المصب الا فى ام البلد دى الى النيل عندنا بيتفرق عند المصب مش عارف ليه بس هو كده عناد عشان تكون مختلف 
حتى زمان من قديم الازل البلد دى بتعاند حتى مع ربنا لما ربنا بعت موسى ربنا بعت كل الرسل لهداية الشعوب الا موسى عليه السلام ربنا بعته عشان يخاطب فرعون راسا ويتخل فى جدال ونقاش معاه يمكن هو عمل كده عشان شعب مصر مختلف عن كل الشعوب وانهم مهمى موسى حكى معاهم وحاول يقنعهم مكنوش حيقتنعو كان لازم موسى يقطع فى كبيرهم فرعون وقدامهم كلهم عشان يكسر ام الهاجس والمكان الى بيحطو فى ايه رئيس  يمسك ام البلد دى 
حاجه تانيه موجوده فى رساله موسى لمصر الغريبه عن بقى الرسل موسى هو الوحيد الى تطبع بشعب مصر ولما ربنا وصاه الوصيه طلب وسطه لاخوه هارون لما ربنا كان بيخاطبه وكما ورد فى سورة طه وقاله " وَاجْعَلْ لِي وَزِيرًا مِنْ أَهْلِي ﴿٢٩﴾ هَارُونَ أَخِي ﴿٣٠﴾اشْدُدْ بِهِ أَزْرِي ﴿٣١﴾وَأَشْرِكْهُ فِي أَمْرِي ﴿٣٢﴾موسى هو الوحيد فى الرسل الى طلب من ربنا انو يكون ليه مساعد وكمان هو الوحيد فى الرسل الى حدد المساعد ده انه يبقى هارون اخوه اذا ف الوسطة وغيرها من الحجات الملعبكة الى فى مصر دى من قديم الازل من ايام الفراعنه ومن قبلها حتى فى انك لما تطالب بصلاح الشعب متطالبش من الشعب انو هو الى يغير لا لازم تروح انتا والمؤمنين زيك بضرورة الصلاح على الراس الكبيره ايام الفراعنه لما تم تغيير الاله الى الاه الشمس راع اعتمدو على قليل من المؤمنين وكانو بيحاربو الاله الموجود ساعتها مفكروش انهم يقعدو يقنعو الشعب بالاله الجديد يعنى المطلوب من اى حد عاوز يغير فى ام البلد دى انو يمسك سلطه او ان ربنا يكلمه فيطلب منه وسطة زى سيدنا موسى 

الاثنين، 29 أكتوبر 2012

اروحنا الى فى بلادنا




مليت من انى اقول او اذكر قد ايه النوبة ضحت او قد ايه حقوقنا ضايعة حولنا كتير ومسبناش باب فيكى يا مصر مخبطناش عليه عشان نورى الناس الظلم والتهميش والنحر الثقافى الى بيمارس ضد العرق النوبى بطريقة الممنهجة دى 
المره دى حتكلم عن حاجه تانية حتكلم عن البلد الى كنت بحلم بيها البلد الى كنت عاوزها الى كان بيحكيلى عنها بابا وجدو كتير 
عارفين البلد دى الى هو الميا وفوقها النخيل وبعدها البيوت التنسيق المتناغم بين كل البيوت دى عارفين الحلم .

انا كنت دايما اسال نفسى او اقول ان جدى وابويا بتغالو وبيمدحو فى البلد القديمة اكتر لانهم مشتاقين ليها لكن انهرده لما رحت انا ومازن وحددا وتيفا وسماره ويحيى ومصطفى " غرب سهيل " 
لمست فيها كل حكاوى ابويه وجدى لمست فيها البيوت النوبيه الى بجد لمست فيها النخل والهوا والشمس الى رغم وهجانها متلسعش اهى هيا دى البلد الى ابويا وجدى كانو بيحكو عنها اصيبت بزهول فعلا نفس الكلام بيتطابق على قرية موجوده فعلا على وجه الكوره الارضية 
البيوت مفتوحه طول النهار والليل اى حد يتخل فى اى بيت الجو الروعه رغم انك قاعد فى عز الظهرية لكن تلاقى نسمه هواء شتوى معدية عليك وبتعاند اشعة الشمس عشان مترفعش من حرارتها ولا وشوش الناس السمحه الى الدحكة مبتفارقهمش حتى لو كان الى داخل عليهم غريب ولا حتى الرملة الى عمرك ما تلاقى فيها حتى عقب سيجارة رمله ناعمة خالصه لونها لون الزهب ولا حتى النقشات الى على الحيطان والبيوت الثلثات واطباق الصينى ده حتى الباب بتاع البيت نفس الطراز القديم للبيوت 

رغم كل الحجات دى من التراث والى قاعدة من قديم الازل لكن تتخل جوا البيت تلاقى اكثر الاجهزة تطورا يعنى ده مش جهل او تخلف ده هو الحفاظ على التراث بعينة .

قعدنا فى البلد دى حوالى 4 ساعات لكن كانو فعلا من اجمل 4 سعات فى الحياه كلها الصفاء الى فى القرية دى مش ممكن يتوصف بالكلام .
المكان موجود وممكن بسهولة تزورو روحو شوفو ابوية وجدى كانو عايشين ازاى وانتو حتعرفو ليه احنا بنعمل كده عشان نرجع اراضينا تانى

السبت، 13 أكتوبر 2012

عن الناس الى بتغير طعم الحياه

انهرده انا حتكلم عن حاجة كان المفروض اتكلم عنها من زمان انهردة كلامى حيكون عن التغير الى مريت بيه فى الفترة الاخيرة الى ممكن نقيدها فى سنه او سنه ونص او اكتر شويه صغيرين فى الفترة الاخيره حياتى كانت بتجرى بسرعة غريبا وده عمل لدماغى اعادة هيكلة .
ويمكن السبب فى كده كانت سرعة الاحداث ومعرفة الكثير من الجديد
فى الفترة الاخيرة انا خسرت شخص عزيز عليا خسارتو كانت بالنسبالى فاجعة كبيرة مش قادر اوصف حالتى لما سمعت خبر وفاته كانت ازاى بس كانت دموعى بتنزل لوحدها وكان جسمى كلو متخدر محمد محسن خسارته عرفتنى حجات كتير وخلتنى افكر اكتر لكن لو كان فضل معايا اعتقد انو كان حيعرفنى اكتر وكان حيفدنى اكتر من خسارته لكن سبحان الله ربنا بيقطع من هنا ويفصل من هنا ولعظمة ربنا ولطفو معايا كان انو عمل تغير سلس فى حياتى الى هو فى الفترة بتاعت محمد الاخيرة كنت اتعرفت على ناس او تقربت من ناس كنت اعرفها قبل كده منهم ابراهيم الريان وبوش عادل والاصدقاء الى فعلا مش عارف دخلو فى حياتى ازاى كده من غير احم او دستور وانا مبسوط من كده هما
مازن علاء الدين " اركمينا "

مازن كان حكى عن طريقة تعرفى عليه الى فى حد زاتها غريبة عارف تكلم واحد لمدة سنه او اكتر او اقل مش فاكر بس نتكلم تليفونات او على النت كل الى نعرفو عن بعض اسمائنا ونحط اكتر من ميعاد عشان نتقابل منوفقكش لكده لكن فى النهاية اتقابلنا مرة واتنين وتلاته وقربنا من بعض اكتر .
عارف يا معلم لما تلاقى اخوك توامك متعرفهوش وتقعد كل يوم تكتشف انكم بتعملو نفس الحاجة فى نفس الوقت انا كل يوم بعرف مازن اكتر وهو بيعرفنى لكن يا باشا انا واثق من ان اى حاجه بعملها حيكون هو بيعملها بردو ماعدا سائل غسل اليدين الى بيستخدمو بعد ما ناكل كل مره
بعد ما عرفت مازن اتغيرت كتير بدات ابوص اكتر على النعم الى انا فيها من انى عايش فى اسوان او انى فى الجنوب بدات ابوص اكتر على افريقيا وذادت نسبة عنصريتى للونى ولاصلى اكتر

مصطفى الشوربجى
تيفا ده بقى حكايتو حكاية تيفا كان بالنسبالى شخصيه غريبة الحقيقة هو غريب لحد دلوقتى مش عارف ازاى اتلم على مازن المجنون
تيفا متشفهوش الا وفى ايدو كتاب الحاجه الى عمرك ما تلاقيها مع مازن او مع حداد الى حتكلم عنو بعد كده تيفا انا وهو كنا على طول فى مشاكل على النت عن طريقة تفكيرو وطريقة حلو للموضوع وانا سعتها كنت مايل للتهدئة يمكن انا شايف نفسى انى عديت تيفا كتير حتى فى نسبة التطرف وهو قالى الكلام ده من فتره قصيرة افتكرت كل الاوقات الى اتخنقت فيها معاه وقعدت اضحك كتيير

رامى



لحد دلوقتى مش عارف هو اسمو رامى ايه بس هو الاب الروحى او الكاهن الكبير وهو اول واحد اكلمو بعد ما طلعت من عربية الترحيلات يوم 29 يناير


فاطمة امام  المقاتلة او الصخرة


فاطمة امام دى بقى حكايتها حكاية فاطمة دى حد لزيزة جدا مش جدا بس ده جدا جدا كمان فاطمة دى بقى نموزج للبنت اى بنت بقى البنت النوبية البنت السمره البنت الجنوبية فاطمة مرت بحجات كتيرة ومواقف فى حياتها تخلى اى حد فينا ينكسر لكن فاطمة صامدة وبتعدى عقبات الحياه عقبة ورا عقبة وبكل رشاقة فاطمة قصة حياتها تتعمل فيلم وتتدرس فى كتاب

حماده حداد
عرفنى عليه مازن حماده شب مكافح ومن مصابين الثوره ده الجزئ الى يظهرلك لما تشوف حماده
لكن لما تقرب منو تعرف ان الواد ده مجبتهوش ولاده قوربتية خالص :) الى ولد الواد ده اكيد ستو الى فى ابو سمبل حماده كميه خفة الدم الى فيه بتغير لون الحياه على فكره زى ما انا ومازن توام حماده والراجل ده

توام بردو بس توام حماده مات من زمان بس هو كان عارف ان حماده حيجى وراه عشان كده سجل لحمادة كل الافيهات وتعبيرات الوش فى فديوهات على اليوتيوب وحماده اتعلم منها :)

يحيى زايد ده بقى " ورقة بفره " دمه خفيف جدة وعمرك ما تقدر تميز كلامه الجد عن الهظار وكمان بيتعصب بسرعه وعصبيتو لزيزه عشان كده لو انتا حتمشى معاه لازم تحافظ على معدل عصبيته وتخلى على طول ماشى دمو فاير احنا بنعمل كده :)
فى الناحية التانية يحيى عملى بدرجة فظيعة ودى ميزة ممتازه فيه

مش حتكلم عن باسم لحدت لما يعقل عشان نعرف راسنا من رجلينا معاه

 

الخميس، 16 أغسطس 2012

عيد النوبه

العيد عندنا مش بس صلاه


العيد فى النوبه حاجه تانيه مختلفه طعم مختلف العيد عندنا هو بداية سنه


عارف لما تكون سهران مع شباب البلد كلهم يوم الوقفه لحد الفجر قاعدين بتتونسو وتسمعو اغانى و لما الفجر يادن نروح على بيوتنا وانتا مروح تلاقى الشوارع كلها نضيفه ومرشوشه والرمله بتلمع فى الشمس والطريق كلو مفرود زى السجادة توصل البيت تلبس الجلاليب وتحط البرفانات " نزاهة نوبيين بقى " ونطلع تانى عشان الصلا نتلم كلنا رجاله وستات شباب وكبار كل البلد فى مكان واحد وبعد ما تخلص الصلاه يتلمو مجموعات على حسب الاعمار السنيه وتلاقى نفسك وسط نفس الشباب الى كنت سهران معاهم وبتاخدهم بالحضن كانك مشفتهمش بقالك سنه وتاخدو بعضكم وتتخلو على اى شارع تلاقو ستات الشارع مجهزين المديد والرز بلبن والكاستر تقعد تاكل لحد ما تملى بقك وانتا ماشى تقزقز فى الفول السودانى والكحك والبتى فور والترمس وتلفو على كل بيوت القريه بيت بيت عشان تسلم عليهم وتقلهم " كورى قون انج نلى " ولما يجى عليك وقت الغدى تلاقى البيت الى انتا رايحلو فاتح الباب ومطلع سُفر الغدا بره وتتغدى وتكمل لحد ما تخلص بيوت البلد كلها .

العيد عندنا هو يوم واكتر العيد عندنا بدايه سنه .

طبعا ده العيد فى التهجير لكن اكيد فى البلد القديمة كانت مختلفه
ابويا بيقول انهم كانو اول يوم بيطلعو من الشرق وياخدو المراكب ويعدو بيها على الغرب بعد الصلا يلفو كل بيوت الغرب ويعيدو عليهم وتانى يوم يحصل العكس بتوع الغرب يجو الشرق ويعيدو عليهم ويقضو طول النهار معاهم

العيد فى النوبه ليه طعم تانى محدش بيدوقه غير النوبيين

الاثنين، 13 أغسطس 2012

مـاهى لما تبقى الشنطـة نـايك والسوسته أديـداس - متزعلش من اللى يجرا بعد كدا


خــلصت المصــلحة
واانفـــــض الفـــرح

أمريكــا الاولى

104
ميدالية متنوعة
كــينــا الاولى أفريقيــا
11
ميدالية متنوعة
وال 23 عالميا

أثــيبوبيــا التـــانى أفريقيـــا


7

ميداليات متنوعة
وال31 عالميا
(الاتنــين شــرق أفريقيـــا بالمنـــاسبة)

جنوب افريقيــا الثــالث أفــريقيـــا

6
ميداليات منوعة
وال35 عـالميـــا

أم الدنيــا وخلاصة البهـــريـــز ووش القفص

"مصر"

الــرابع أفريقيا وال 57 عــالميا بميداليتين

الجـــوز فــــــضة

فى نــاس هتقول الحمد لله

ياعم دا احنـا ال57 عالعالم , يا عظيمة يا مصر
وهاتك يا بوس فى الايادى وش وضهر

وفى نـاس هتقول رياضة ايه وبتاع ايه

دا فى نقص غـاز وجنود استشهدوا على الحدود
وفائض الاحتـياطى النقدى وصل للمــأسورة الام

حاجات كتيرة كدا يعنـى


بس الفكـرة زى ما واحد صحـبى قــالى وعلمت معايا

الاولمــبياد دى بتبقى زى استعراض عضلات لمكانة الدول
فى العالم
يعنى الترتيب بتاع الاولمبياد لو ركزنا فيه
هنلاقيه
مشابه لنوعا ما لترتيب الدول وتقدمها

وفى نفس الوقت لو ركزنا فى المركز بتاع مصر ال57 هنلاقى اننا

فعلا نستحقه ولايق علينا وان تصرفاتنا جابته لينــا

بصوا معايا من اول ما روحنـا لندن


دا طابور العــرض






اللبس بتاع الدخلة نفسهــــا



ايوا البدل الانيقة دى


بصوا الراجل اللى على الشمال الكبير فى السن شوية


شايفين البدلة قافلة عليه بالعافية ازاى

بصوا الكم مرفوع ازااى
عاااملة ازاااى



بيفكرنى بالظبط بمنظر العساكر فى مركز تدريب دهشور , اللى هو الافرول انت ونصيبك يا برنس

لا مقاسات ولا بتــاااع
وعشان كدا زى ما بيطلعوا عساكرنـا مبهدلين
ومنظهرهم يعر , طلع برضه رياضينـا مهرولين
ويعروا بنفس القدر والكمية


ثم هو أصلا ليه بدلة

انت مش فى ديفيليه يا برنس
ولا عمرك هتــأكل مع الناس التانية
دى فى البدل ولا النزاهة

ما تلبس يا عم لبسك انت


جلابية صعيدى مثلا , والبنات يلبسوا لبس الستات الصعايدة


البس بامبوطـــى والستات يلفوا ملاية


اعمل ايى مصحلة ,

تعرف الناس دى من مجرد البصة
انت جاااى من فـــين

شوف البعثات الافريقية والجمال فى الدخلة بتاعتهم


المفروض الفكرة من العرض دا

انك

انت بتــورى للعــــالم انت ايه

مش بتوريهم قد ايه انت تقدر تبقه شبههم


نكمل اللبس طب يا معلم يم

الحوار بتــاع
الاطقم الــريـــاضية النــايك أم ســـوستـــه أديداس

بصوا محدش يقول اتضحك علينـا

لا يا برنسيسات
حكاية المورد والاطقم الرياضية
وهتبعيلى الشنطة كــاملة بكـــام
وهتلزقلى استكيــر ماركة ايه عليها
وهستلم منك على انها اصـــلى

فيها احـــلى "أكل عيش" بتعبير المــصريين

واسالوا حد اشتغل فى مجال الملابس الرياضية
او حد ماسك اى حاجة فى اى نـادى
وهتعرفوا المصالح اللى بتيجى من ورا الموضوع دا

يعنى الناس رأيحـــة قابضة وعارفة , وعدت الاطقم دى

على كذا لجنة واتوافق عليها
عشان الكــل وأكـــــــل يا معلمين


ريحوا بقه اللعيبة فى القرية الاولميية , بعد العرض الفخيم

والدنيا بيس وسفر وبتااعه
اتعشوا والدنيا تمام

فلازم يحبــسوا

يروحوا يعملوا ايه بقه اللاعيبة
فى لندن وجوا القرية الاولمبية

يشــيشوا

اى بمعنى يدخنون الشيشة
المفروض الناس دى رياضيين
اللى هو العقل السليم فى الجسم السليم
يعنى مش هقولكم شيشة دا السجاير نفسها
تعتبر المفروض احد الموبقات
تروح تسافرلى انت من مصر بشيشة
وتدخنها جوا الاوضة , طبعا عشان البرنس ما يعرفش ومش واخد
على كدا
فمخدش باله من الفـــايير ديتكتر
المجس- الحساس - البستم
مش مهم الاسم
عبد الرحمن - الغريب


مش مهم الأسم



المهم هو شغلته


اللى هو لما بيكون فى دخان فى الاوضة بيدى تحذير وصفارة

وفى نوع منه بيروح فاتح المية تلقائى وفى غيره بيكون متصل
بدايرة المطافى القريبى من المكان
(طبعا الكلام دا كله بره مش هنـا)
فبس بقه رااح ابن بنت الحلال بسبب الحركة دى , كهرب امل القرية الاولبيمة كلها
خلى بالك القرية دى بتضم كل بعثات الدول , يعنى انت عككننت على
مواطنـى 86 دولة بيستنوا الحدث دا كل اربع سنين مرة
عشان يتنافسوا فى الرياضة
وحضرتك جـاااى تغير جو وتشوف رمضان فى لندن جوه ايه


خلص بقه حوار العرض والشيشة


ندخل بــقه على اللعب بقه

الطحن يا راجاللة

-----------

----
--
هما ميداليتين
اصلا هحكى فى ايه مش محتاجة
واحدة كرم جابر وواحد للراجل بتاع الشيش

( ثم يحضرنى سؤال ويحز فى نفسى)

هى ليه رياضات زى الشيش , والرماية , الجومبااااز,
تحس ان فى ناااس فى مصر كدا
مابتطلعش منهم
فااهمنــى
اللى هما بيروحوا ناادى الصيد
ومشتركين فى الأهلى بتاع مدينة نــصر

وكدا

اللى همــا

ليه مثلا منلاقيش فى مركز شباب فى الفيوم مثلا


مدرب رمـــاية وبطل بينافس فى الجمهورية


ولا نلاقى بطل فى الشيش من العريش

دا حتى لايقـــه وجايين على نفس الوزن


ليه فى رياضات لولاد النــــاس




دا حتى دايرة المنافسة فى مصر فى الرياضات دى لو

وسعت اكيد هتخرج لنا مستويات اجمد وهتخلى الاداء يتطور
بتاع اللعيبة دول

انما

لما مثلا مــاهى تنــافس لوجيـــين السنة دى فى الرمــاية

والسنة اللى بعدهـــا اخت ماهى الصغيرة , تتغلب من لوجين برضه


وبعد ما يخلصوا لاماتش يقعدوا فى سلنتروا


اكيد مش هيبقى فى منــافسة


ليه يعنى مياكونش فى بطلة رماية اسمها فتحية مثلا


وبتروح التمرين بالميكروباااص بعد ما تخلص شغلها فى وسط البلد


بس كفاءة ومسيطرة

وجد كمـــــان


ليه فى رياضات فى مصر

"كـــومـــباومد"


ليه الناس العادية


عايزينهم عتيـــلة بس




======


بس سيبكم بقــه

النهاية السعيدة بقــه

ادارى فريق المـصارعة


فوت على اتنين لاعيبه من عنده

الماتشات بتاعتهم
عشان النجم كان فى فاكر الماتشات هتتلعب الساعة
واحدة الظهر كالعادة

بس اللجنة قدمت الماتشات لتسعة الصبح

واكيد كل مخاليق ربنا اللى هنااك عرفوا واتنبهوا ووصلهم اخطارات بكدا

بس البــرنس نـــــسى




هى دى الحــال جوا مـــصر

ومصطلحاتك بقه

ويعم ربك بيستر

وهتعدى
وهتتعشى
وتمام فــل , واكلة عيش حلوة
ويا عم هو مين شايفنــا
وان كل مرة فى نفس الميعاد , اكيد بكره نفس النظام

البعثة راحت لندن

بكل دا جوا الثقــــافة الدماغية
فكانت لازم واكيد النتجية
تطلع كدا
لا عجــــــب

الثلاثاء، 7 أغسطس 2012

Brownie: خضر العطار و اسمر اللونا

Brownie: خضر العطار و اسمر اللونا

خضر العطار و اسمر اللونا

 مازن علاء الدين او اركامني يبدع 
بيتكلم عن الفن و ازاي بيرسخ الهوية 
و بيسطر التاريخ 
و تطور المجتمع 
عن اسمر اللونا بصوت العبقري خضر العطار 
يكتب:
 
بــــصوا 

الفــيديـــو دا

ممكــن يفهمك ويــشرحلك
ويقربك
من أيـــه هو
"خــضر العطـــار"
عندى
واللى عــارف هو ايه عندى
هيعرف هو ازاى وصــل لكدا عنــدى


" أسمــر اللونـــا" الاغنــية دى ,
دى مش أغنــية ,
هـــقولكم حــاجة

عــارفين لمــا الاغريق تبقى عندهم
"الالياذة والاوديســا"

لمــا مــثلا العرب يتفــــاخروا
بالمعلقــات الشـــعرية

لمــا اى شــعب فى الدنـــيا
تجمــعه كــلمات كدا تبقى عنده زى نشيد
كدا فى تكــوينه
الاغنــية دى هى كدا بالنسبة لنــا

الراجل يقولى مين صاحب الاغنية دى
محدش يــعرف
طب سيبك من صاحب الاغنــية

الراجل يقولى كلامها كــله
برضه محدش يعرف

عارفين لمــا اغنيــة كل واحد بيغنيها يروح ضــايف عليها
كوبليه , يجى واحد بعديه بعشر سنين يضيف كوبلهين تــااانى

ماشى مع العصر اللى هو فــيه

بس مش العملية ســايبة لايا معلم

كومبأ كـش كــش كومبــا كــــش"

دى رنــة الطـــار , لازم اللى هتضيفه هيمشى على رنة الطــار دا

عاارفين ســاعات بحس ان الاغنــية دى

اول مــا رجــع طهــرقاها بعد ما انقذ القدس من ايد الأوشورين

وهو داخل كــرمة
استقبـــلته أمهات الجنود النوبيين بالاغنية دى
"أسمــر اللونــا"
ومن ساعتها لدوقتى كل واحد بيحاول يثبت جدارته ان يعرف
يطــرب
نــاس سميعة بالاوى زى النوبيين
يجــى يزود عليها
اسمر اللونــا حكايتها

حكايتها كبيرة تتقال وقت تــانى

---
نرجع لخـــــــــــضر


بصوا فى الكليب دا , دى اصلا كــانت احتفــالية لجدكــاب

مين جدكــاب

ااقولكوا , عاارفين الراجل اللى حط النقط فوق الحروف العربى
عارفين الاخوة "جوتنبرج" اللى اخترعوا الطبـــاعة
عاارفين شــامبلــيون , اللى فك رموز الهيلوغريفــى

عارفين اللى واحد يجــى من العدم , يعمل حــاجة تستغرب ساعتها
ايه دا احنـا ازاى كنا عايشين من غير الحاجة دى

هو دا بــقه جدكــاب

جدكاب بالنسبة للغة النوبية , تقريبا ابرع متحدثيها ,,
لا سيبك من متحدثيها دول , هما كتير

طب هقولك حـاجة , جدكاب بيكتب شعر نوبى بالحروف النوبى
جدكـاب دا ذاكرة النـــوبة
مش ذاكرة تواريخ ولا حصل فى السنة الفلانية كذا وكدا

لا دا حد يقولك يا عم كنا بنصحى نروح عالشط بتاع البحر ,
وفى العصر نطلع نخل
حد بيقولك تفاصيل يومية
بيعيشك كانك روحت , ولما يسكت بتحس انك انت اللى اتنيلت
اتهجرت ,
بتحس انك انت اللى سبت مكانك على الشط بتاع نيل الدميــرة

مش حافظ له كام تاريخ وبس على كدا جــبرت
جدكــاب دا ربنــا يديله طــولة العمــر
ااقولك ربنــا يديله حتى من اعمــارنا احنــا

لمــا راجل بكل المواصفات دى

يجـــى لمــا خــضر يقــول
"اسمر اللونــا"
ويرد وراااك جدكــاب بعد ما تقول
"اديبكى جواب جو يوسى
فـــينجومولا
اى لكا ريكـا فيرويرى
وأسمــر اللونــا"
فى استمتــاع وتللذذ غـــريب
لمــا تخلى جدكــاب يقـــول
"يــاااااااه"


بعد كدا يعدى كوبليه ,
ولمــا يجــى خــضر يقول
" ناسين نــامى نــاسين نــامى
ايجــا كوبرى دو نــاسيين نــامــى"

ميقولهـــاش عشان خلااااص

السكـــر اللى فى اللحن ســرى فى ارواح كل واحد قــاعد

بقهم همــا من غير ما يقصدوا الكورال اللى بيرد
ويــشاور بـــأيده
فى نـــــشوة ما بعدها نـــشوة وهو بيرد ورا خضر
حــد تـــانــى أسمــــه
"ابراهيم شـــعراوى"
مش هحكــى عنــــه

أســالوا حد كبير بيقرا أدب نوبى مين
"ابراهيم شــعرواى"

لما خضر فى 6 دقــايق و 28 ثــانية
يعمل فى النـــاس دى كدا
وهمــا قاعدين فى جمعية"ابوسمـبل"
البلد اللى هـــى
مكان نزول الوحـى للفن النـــوبى

ما تستعجبوش يعمل فى النـــاس العااديين اللى
زيـــــنــــا ايه


==============

الجمعة، 3 أغسطس 2012

الشهداء كيف تعاملنا معهم


فى البداية لا يستطيع احد منا ايقاف القدر الذى اراده الله كون هؤلاء ماتو بهذه الطريقة فى سبيل ما يؤمنون به وفى سبيل بلادهم وسبيلنا نحن فى البداية لقد فدونه هؤلاء الشهداء بارواحهم ودمائهم الطاهره كانو هم وقودنا طوال ايمام الثوره حتى بعد هدوء اندلاعها كانو هم من يشعلون الثوره مره اخرى فى البدايه شهداء يوم 25 ينايرو مصابينها هم من جعلو الشعب ينزل يوم 28 وهم من اجبرو النظام على السقوط كذلك شهداء العباسية لولاهم لما كنت ستكون هناك محاكمه للنظام الفاسد دون التعليق على نوع المحاكمة وايضا بدونهم ما كانت لتكون هناك حكومه شرف او اى شى ترتب بعد ذلك ما اكتسبته مصر من دماء شهدائها اشياء كثيره لا تعد ولا تحصى ولكن ما جنوه هؤلاء من الدوله تكريم او حتى تخليد لزكراهم بالعكس تم نسيانهم وحتى تشويههم ومايقات اسرهم وحتى الان يعاقب اهالى الشهداء على انهم قدمو اولادهم قرابين لهذه البلد .
اما عنا من نسمى انفسنا بالنشطاء السياسيين او حتى النخبه السياسيه فايضا كان حالنا من حال الدوله لم نقدم الا القليل  لرفقاء دربنى ولاحبابنا واخوتنا فلم نستطيع سوى تكريمهم سواء فى ذكرى وفاتهم او ميلادهم او اى مناسبه اخرى لها علاقة بالفقيد ولكن لو نظرنا لها بمنظور اخر سنرى اننا لا نملك سوى هذه الاحتفالات التى نتذكر بها شهدائنا ورفقاء كفاحنا .
تمر السنوات ويتسع حدود الفجوه بين اخر مرة رئينا فيها اصدقائنا من الشهداء ونجد انفسنا مكتوفى الايدى لا نقوى على عمل شى الا زياره قبورهم او حتى الترحم عنهم وقراءه الفاتحه لهم لكن ان ناتى بحقوقهم او ناخذ بثارهم لم نتعود على ذلك او بمعنى اصح نحن اجبن من ان نقوم بذلك .
اتسال كثيرا لو كان صديقى الشهيد موجود الان وانا من وافتنى المانيه بدلا منه ماذا كان سيفعله انا اعلم صديقى جيدا لكنى فى الواقع لا اعرف ما كان سيمكنه ان يفعله فى هذه الظروف ابسط الامور ان يكون موجود فى منذلى بشكل يومى لساعد ابى وامى حتى يعوض بعض النقص والفراغ الذى صنعته انا بذهابى عنهم ولكنى لا استطيع ان افعل هذا ايضا لصديقى فانى حتى لا اقوى ان اضع عينى فى عين امه او ابوه بل انى لا استطيع اصلا ان امر من امام منزله او حتى شارعه محمد انا اظل اتذكرك فى صمت فى وجدانى فى بعض كلماتى 
اعزرنى صديقى فلا اقوى على فعل اكثر من ذلك

الخميس، 2 أغسطس 2012

مشاركتى فى مشروع نظره : كلام رجالة

دى مشاركتى فى مشروع مؤسسة نظره بتاعت

 كلام رجاله
يمكن انا محستش ان الرجوليه دى حاجه اكتسبتها من الحياه او من ضغوط عائليه او مجتمعية بس كل الى بيحصل ان كل اما كنت اعمل حاجه كانو يقولو لا المفروض متعملش كده انتا راجل زى مثلا العياط لما كنت اعيط وانا صغير عشان ماماتى حتنزل من البيت وتسيبنى او مثلا لان اخواتى حيتفسحو وانا لا سعتها مكانوش بيلاقو مبرر يقلوه عشان اسكت انى راجل والرجاله مبيعيطوش لكنى كنت بردو بستمر فى العياط يمكن انا كنت مكبر دماغى فى حجات كتيرة عشان كده لحد دلوقتى بالنسبالى الموضوع مش مهم ان الناس تقول عليا راجل ولا لا زى مثلا انى البس تى شيرت بمبى بالمناسبه فى مره كنت فى العربيه ولابس التى شيرت البامبى السابق كان فى ستات فى العربية قالو ايه ده الولاد بقو بيلبسو تى شيرتات البنات كمان اخدت الكلمه من هنا وانفجرت فيهم لدرجت انهم سابولى العربيه ومشيو عشان كده انا منظورى للجروليه مختلفة شويه عن بتاعت المجتمع والسبب يمكن فى ده انى عايش فى مجتمعين ايون بالظبط هما مجتمعين الاول هو النوبه الى بتكون فى المراه هى كل الحياه بمعنى انها بتقوم بادورها وادوار الرجال كمان لدرجة انها ممكن توصل انها تشتغل وتجيب فلوس وفى نفس الوقت تلقيها فى البيت بتحضر الاكل وكمان فى العصر تنزل مع العيال تشتريلهم هدوم وفى نفس الوقت تشترى للرجلها كمان هدومه حتى جزمتو وفى اخر الليل تلقيها فى احلى حله وجلدها بيلمع من الدلكه وريحه بخورها توصل لاخر شرعها وتبقى فى الحى زينه لجوزها والمجتمع التانى هو المجتمع المدينه الى هو الراجل بيشترى كل حاجه للبيت حتى الخضار والبامبرز للعيال ومش بعيد يكون الاولويز كمان والست فى البيت تعمل الاكل وتراعى جوزها وبس كتير كنت بستغرب لما اكون راجع انا وابويا من الشغل وادينا فاضيه ونلاقى كل الرجاله الى معانا فى العربيه محملين كياس خضار ورئوس توم عشان البيت لحد دلوقتى يمكن انا لم اتمرس على انى اقف عند واحد بتاع خضار عشان اشترى او انقى او حتى افاصل معاه عشان كده اان بحمد ربنا على وجود امى اكتر :)
عارف ان ده يمكن مش الغرض من المشروع لكن ده الى جى فى خاطرى وفى النهاية ليكم حق النشر او المسح :))

انا وانتى والشحتفة الى بينا

بعيدا عن كل السخط وضوضاء المدينه والى بيحصل حولينا حتكلم انهرده عن شعور تانى عايش معايا بالتوازى مع حياتى احساس بدات المسو من حوالى 3 سنين او اكتر يمكن الحاجه دى هى الى مصبرانى على العيشه وهى الى بتخلى دماغى تطلع من الزحمه والسياسة عشان تفكر فيها .
مكنتش اعرف انه ممكن يعمل فيا كده يغير حياتى طريقة تفكيرى يخلينى زى المشلول فى اوقات واوقات تانية ابقى طاير من الفرحة اوصل لدرجة الانتحار وبعدها بثوانى احب الحياه واشوفها مزهزهة ووردى .
من غير طول تفكير فى الموضوع الشعور ده والاحساس هو اى الناس بتسميه " الحب " فى الواقع انا مش عارف ده حب ولا ده حاجه تانيه لانى معرفتش الحب قبل كده ولا جربتو تانى لكنى اعترف انو شعور مختلف وانا حبيتو والفت انى اعيش فيه ومن الاخر ربنا يديمها علينا نعمة لانى فعلا مش عارف اعيش من غيرو .
عارفين كده لما تكون طول عمرك بتشرب شاى ماسخ سادة  وتكتشف السكر واللبن الحليب ابو اشطة يلونلك الكوباية ويفضل الاشطة من فوق بلونها الابيض وتذوب فى الحليب وتسيب حتت سمنه وتروح انتا مسقى حتت البسكوت فتطلع بالقشطه  او بطاطس محمرا من غير ملح وبعدين تكتشف الملح فتضيفو عليه وتدوق وتحس بالنشوه الغريبه مع اضافة الملح فمتقدرش تبطل تحط ملح على البطاطس ولو نسيت مره ممكن متاكلش البطاطس مع انك كنت واخد على طعمه من غير الملح من زمان .
كانك كده كنت ماشى فى العالم ابض واسود واكتشفت الالوان .
عارفين اللزه الى فى الموضوع زى كده ما تقعد تسمع فيروز وهى بتقول اهو ده الى صار وانتا بتشرب فنجان القهوه السادة وبتشوف الشروق .
زي كده متكون نايم على مرتبة من الريش وتلاقى معالم جسمك بتنغرس جواها .
ولما تغوط بقى فى الموضوع والنهاية تكون صدمة بتحس ان حياتك انتهت فى الوقت ده هى فعلا بتكون انتهت فعلا والى انتا عايش بعدها دى مش حياه .
انا اتصدمت فى الموضوع ويمكن بعدنا عن بعض فى نفس الوقت مقربين مع بعض باروحنا لكن مفترقين باجسادنا زى ما عمنا منير بيقول كده انا على طول " بالنسيم انا بحرسك "
زى ما انتى كنتى حياتى ومازلتى كذلك مش عارف اشوف حد فى خنتك مش قادر انسى طريقة كلامك مش عارف انسى غموضك الى عايشه فيه موضيعك الى مبتفكريش فيها غير لوحدك اسلوب حياتك مش قادر انسى نومك طول النهار فى فترت الاجازه وسهرك الطويل طول الليل كمان مش قادر انسى رغم حبك للشغل عشان يخرجك من الملل لكن كسلك من انك تصحى كل يوم الساعة 6 عشان تجهزى وتنزلى عارفة لحد دلوقتى يمكن انتى عايشه قدامى بشوفك فى طريقة كلامك مع الناس مع اصحابك واهلك الى فى البيت حتى معايا لما تقدر الظروف وتطلبى رقمى غلط ;) .
مش عارف احنا ليه رغم الاحساس الى عيشينه ده قررنا اننا نبعد من الاساس لكن زى ما اتفقنا هى الظروف و العادات وعقائدنا والقيود الحياتية الى انا اصلا ضدها ومش بعترف بيها .
بس بردو فرحتى لما نكون مع بعض على التليفون او نتقابل كل الحواجز دى بتزوول وولا كانها موجود والسمو الى بينقلنا من المكان الى قعدين فيه للمكان السماوى الملائكى الى لا يقدر بوصف وحتى بعد الرجوع من المكان ده الفرحه والبسمه الى بتفضل معلقة على وشى لفترة طويلة .
ونرجع بعدها نبعد تانى نبعد كتييير ونرد على ولع وشوق وامل وبسمه حلوه  

حنفضل نبعد كده ونبعد ونرجع تانى

الأربعاء، 1 أغسطس 2012

لو كنت معاك


صباح الخير يا محمد صباح الامل والضحكه الحلوه الى طول حياتك كنت معيشنا فيها صباح النشاط الى مكانش بيزول منك رغم تعبك ورجوعك من الشغل وانتا بتكلم كل الناس وتتفق عشان ننزل نلم توقيعات بيان التغيير .
ازيك عامل ايه يا صحبى ... رقمك كل اما اتصل بيه واحد تانى يرد عليا ويقولى النمره غلط بتاسف واقفل التليفون وافتكر انك مت اخر مكالمه بينى وبينك الى فضلت محطوطه فى سجل المكالمات فتره طويله رقمك الى رغم انى عارف انك مش ممكن تتصل عليا تانى لكنى سايبو ومش حمسحو عشان افتكرك على طول ده لو نسيتك حتى اسمك الى مش حغيرو mohsen@m.aglt3ir .
وحشتنى جدا ونفسى اشوفك حتى لو فى الحلم زهقت من انى اتصفح صورنا مع بعض كل فتره وافتكر كلامك معايا عن موضيع كتيرة فى الحياه .
عدت سنه يا اخويا من غير من كون مع بعض او حتى نكلم بعض .. على قد زعلى انى مش حشوفك تانى لكنى فخور لانك مت موته انتا كنت تتمناها .
عارف انك زعلان منى لانى بقالى فتره مزورتكش بس والله العظيم مبتروحش من بالى وسامحنى يا صحبى لو زعلتك فى يوم او نمت ليله وانتا شايل منى مع ان محدش كان يقدر يزعلك .
وبعد مرور سنه على وفاتك مش عارف انعيك ولا اكتب عنك رثاء لكنى حكتفى بالسكات وحقولالدعاء الى قلهولى يوم جنازتك لما الناس كلها شفتنى منهار .
اللهم انى ضعيف لا اقوى على الثار منهم .... اللهم انتقم .... اللهم انتقم .... اللهم انتقم

الخميس، 5 يوليو 2012

عن بنت كاتول اتحدث


اسمها قسمه . قسمه كاتول كاتبه من اسوان يمكن هى متعرفنيش وانا كمان شفتها مره او مرتين بالكتير متكلمناش كتير يعنى بس كنت بقرالها قصص ومقالات فى مواقع على النت قسمه نزلت اول كتاب ليها بعنوان  " صوابع زينب " تبع قصر ثقافه اسوان الكتاب نازل عند بتاع الجرايد وسعرو زهيد جدا واشتريت الكتاب .
الى بهرنى بقى بعيدا عن اسلوبها وطريقه سردها للقصص هى جرئتها الغير معهوده فى اسوان وفى البنات خصوصا دى حاجه نادره جدا اننا نلاقيها قسمه دخلت فى المواضيع الشائكه الى بتمس البنات بجد زى مثلا : خانه النساء , قطه مش مغمضه , سنواتى الداميه
فى سنواتى الداميه مثلا قسمه بتتكلم عن مراحل الى بتمر على النساء عامة بدايه من الختان الى هو اول موقف للمراه مع نصفها السفلى دون ان تعلم سبب هذا الفعل او حتى الغرض منه , اما الموقف الثانى الذى تنزف فيه المرئه الدم وهو وقت بلوغها التى لا تكن تعلم عنه شئ ايضا ولم تكن مستعده له , والمره الثالثه هى عند زواجها وجماعها الاول اما اخر داميه هى عند ولادتها لاول مولد لها والتى تنهى به القصه بجمله " حين حملت دميتى اللحميه ,نسيت كل تجاربى مع الدماء "
ايضا تحدثه قسمه عن مراره الصبر لدى ام لولد ابى ان يترك بلده وامن ان بلده لن تتير الا بامثاله فى قصه
 " المخزون الاستراتيجى من الصبر "
" كانها هى المعنيه بغزل الايام وشاحات صبر.. تندثر بها من بروده سنوات .تسجل غيابات متكرره للفرح.. تعبئ نفسها فى خانه " بكره تتعدل " لكن بكره هذا ياتى وهو محمل باقيا امنيات مبتوره جعلتها متخمة بالصمت , يطبق على انفاسها لانها محشورة فى خانه تضيق عليها حاولت ممارسه تدريبات انقاص وزن الكآبة لتناسب خانتها , ولم تجد نفعا .
وكل بكره يجعلها تستنفذ مخزونها الاستراتيجى من الصبر حملت بأن تتخضب بالحناء .. تمرر الكحل فى مقلتيها يوم زفافه فهو طفلها , حلمت ان يتقافز اطفاله الافتراضيون فوق حجرها أخذ منها وتركها تتجرع مرارة الفراق مع كل بكره ياتى خاوى اليدين .
ليته فراقها راحلا لبلاد نفطيه مثل اقرانه او حتى مهاجرا لبلاد ثلجيه يغتسل بالماء والثلج من فشل متكرر منى به فى الوطن بل هو يشاركها أرض هذا الوطن يطالع سماءه خلف قضبانه منذ خمسه عشر دهراٌ .. لانه حمل للوطن حفنه احلام ل " بكره " الوردى الحر حلم بوطن حاضن لابنائه " معشش عليهم " بدلا من " تهجيجهم " خارج خارطته المكبله .
انتظرت مجيئه .. تفترش حصير قديم امام البيت تترقب عودته .. هو يراقب السماء وراء القضبانه ..لا هو كسر القضبان ولا هى برحت مكانها اليومى من الانتظار "

الجمعة، 29 يونيو 2012

بنت افريقيا الاصيل

افريقيا بكل معانيها بدايه الحياه على وجه الارض تطرب العالم وتعمر فيه
  افريقيا بكل معانيها بدايه الحياه على وجه الارض تطرب العالم وتعمر فيه
فمن الطبيعى ان تجدها تعلم العالم اجمعه كيف يزرعون ويحصدون وكيف يعيشون وايضا كيف يثورون وكيف يحضرون حريتهم بايديهم ومن براعتهم انهم يتركون نسائهم تعلم العالم كيف تكون الحريه وكيف تكسب الحريه
فى الوقت الذى تناضل فيه النساء فى السعوديه لتكسب حق قياده السياره وفى الوقت الذى تكافح من اجله المراه فى مصر حتى لا تختن بناتها او ان تكسب حريتها فى ان تلبس ما تريد وفى الوقت الذى تناضل المراه فى الكويت لتكسب حق ان يكون لها مقعد فى البرلمان
لا اقلل من نضالهم او اجتهادهم للحصول على حقوقهم .
ولكن كعادتهم يتفوقون سيدات افريقيا علي قرنائهم في القارات الاخري في مجالات كثيره .
المرأه في افريقيا تقوم عليها الحياه .
ففى كل الاوقات السابقه كانت فى افريقيا رئيستين لدوله فى افريقيا

الاولى كانت

 إلين جونسون سيرليف Ellen Johnson-Sirleaf

والثانيه كانت
جويس باندا
لتعلم افريقا العالم كله مقدره المراه فى الاداره والرئاسه ولتغير منظور العالم والعرب خصوصا ان المراه تصلح ان تكون فى اى مكان ليس فقط فى المنزل او من وراء حجاب المراه قادره على تخطى كافه الصعاب والعواقب فى حياتها المراه فى افريقيا تقوم عليها الحياه.
فالمراه عندنا تغير مجتمع تمنع حروب اهليه مثل :
ليما غبوي  Leymah Gbowee
ولا يتوقف نشاط المراه الافريقيا فى قارتها فقط بل انه يتخطى كافه الحدود فمن الممكن ان تجد المراه الافريقيه تواجه العنصريه فى امريكا مثل :

روزا لويس باركس

كل هذه النمازج على سبيل المثال وليس الحصر لان هناك اكثر من ذلك بكثير.
ما جعلنى اكتب هذا الموضوع هو اننا فى مصر نطالب بوضع قانون للتحرش حتى يتثنى للمراه ان تمشى بكامل حريتها فى شوارع بلدها وفى الجنوب اجد السيدات ينظمون ويشاركون فى مظاهرات لتحرير بلادهم ( السودان ) شتان هو الفارق بين ما نحارب من اجله نحن وما يحاربون من اجله .


السودان التى لم يذكرها المصريون الا فى نكاتهم او ضرب بهم المثل فى الكسل
السودان الان تتخلص من حكم الاسلاميين المتغطرس فى نفس الوقت الذى تسلم فيه مصر الحكم لاسلاميين ليس غريبا ان تكون البلاد الافريقيا متفوقه على مصر حتى فى ثوراتهم فى الوقت الذى كانت مصر تبرم المعاهدات لتتخلص من الانجليز كانت السودان تقوم بثوره عليكم ان تدركو الفارق الزمنى بين البلدين .

وما اروع ان تجد من ينظمون التظاهرات ويشاركون بها هم النساء السودانيات 
تخيل المراه التى تحافظ على جمالها وعلى نضارت بشرتها تخيل المراه التى لم تخرج يوما من بيتها دون ان تتعطر وتتبخر او حتى دون ان تمسح الدلكه تخيل ذلك الثوب المتناسق الالوان مع الشبشب الخفيف الرفيع ليظهر جمال نقش الحنه على القدم فى مظاهره تهتف وتطالب بحريه بلادها او حتى بتطبيق الاسلام العادل ليس الاسلام المتطرف الذى يشق من الوطن شق بعد ان شق الجنوب الان يخدش الغرب هؤلاء النساء فهمو ما ستؤل اليه الاحوال لو انتظرو او تركو الحال كما هو عليه.
صوره اخرى للتظاهرات فى السودان اوقفتنى كثيرا امامها تخيلو روعه المشهد
اليست هذه المراه ام لاحدى الاطفال او حتى الشباب تخرج فى تظاهره وتقطع الطريق والاجمل من ذلك انها لا تهاب احد لم تدع فى بالها ما يمكن ان يحدث لاطفالها او حتى لزوجها لكنها سئمت من السكوت والصبر خرجت لتجلب حق ابنها الرضيع فى ان يجد السودان كاملا لا منفصلا او بضع دويلات .
وبالعوده لموضوعنا عن المراه فى افريقيا وبكونى نوبى افريقى فأنا ارى امى ومن قبلها جدتى وهى وحدها تقوم بكافه الاعمال من تربيه الاطفال الى شراء حاجيات المنزل الى تنسيق المنزل وتزينه


" فنعمت الله على افريقا انه خلق لها نساء"

الجمعة، 22 يونيو 2012

بلد سوار الذهب

بلاد تلون اهلها بلون طميها بلاد اكتسب اهله من نيلها قوته وصلادته بلادا رغم كل ما يحصل بها ورغم ديكتاتوريه حكمها منذ زمن بعيد نجحت رغم كل هذا بطيبه اهلها في ان تنشئ لنفسها كيانها الخاص انها السودان بلد " سوار الذهب" حتي في ظل الاوضاع الراهنه تمتلك صبغتها الخاصه لتعاند كل العوائق مثلما نيلها العظيم لا تخشي شئ من جبروت وطغيان حكامها الي كسر الانفصال الي التعتيم الاعلامي .
منذ عده ايام قامت في السودان التظاهرات السلميه للمطلبه باقل الحقوق العداله الاجتماعيه منبع التظاهرات كانت من معظم الجامعات الحكوميه .

طريقة تعامل الحكومه مع تلك التظاهرات كانت مثلها مثل باقي الحكومات في البلاد العربيه القمع المستمر والتعامل بوحشيه وتضليل اعلامي  معها .

حكومه السودان كانت تقوم بكثيرا من التجاوزات لدرجه اني كنت مرشح السودان لتقوم بها ثوره قبل ليبيا ولكنها تاخرت في ذلك حكومه السودان برئيسها البشير كانت السبب في انفصال الجنوب عنها وكذلك مشكله دارفور  .

ايضا لتعامل القطري العربي والافريقي كان مخجل للغايه لانك اذا تصفحت الصحف العربيه والافريقيه تجدها خاليه من اخبار الاحتجاجات منذ عده ايام عندما كانت التظاهرات في اوجها في اكثر من ثلاث جامعات صعقت بخبر في جريده الاهرام المسائي يقول تظاهر مائه شخص في السودان اعتراضا علي زياده اسعار المحروقان .

اليس السودان بلد شقيقه اليس من متابعه اخبارها حمايه لحدود مصر الجنوبيه .

في الختام كثيرا ما كنت اقول لاصدقائي اني اتمني ان تنتهي ثوره مصر علي خير لاذهب الي السودان لاشارك في النضال ضد جبروت البشير " كان الله في عون رفاقي وزوات عرقي وابناء عمومتي "

'اعتزر عن عدم تنسيق الخط او اي اخطاء لغويه لانني اكتب هذه التدوينه من الموبيل وذلك لظروف قهريه

الاثنين، 11 يونيو 2012

اللهم لا تجعل مصير محمود مثل مصير محمد

محمد محسن  و  محمود محمد امين

هو ذلك الشعور المؤلم الذى ينتابنى كلما تعرض احد من اصدقائى الزائرين للقاهره ام المقيمين هناك من المناضلين الجنوبيين لمكروه ذلك الاحساس بالتكبل فى مكانك ذلك الضغط الهائل على الجسد وعلى التفكير انه العن من الاصابه بالشلل عندما تجد نفسك محاصر بحوائط كثيره لا تجد فى يدك اى شئ لتفعله لصديقك العزيز حتى تسمع صوته او ترى ابتسامته او حتى تشتم رائحته فى المكان ذلك الشعور انتابنى كثيرا منذ البدايه يوم ان تعرض اخى وحبيبى محمد محسن للاصابه فى احداث العباثيه ونقل اثرها الى المستشفى الى ان وافته المنيه دون ان اراه علما بانى كنت اخر من سمع صوته وكعادتهم الجنوبين لا يشعرون احد بكم الالم الملقى عليهم عندها قال لى محمد " متخافش ياد انا كويس وزى الفل ودى تعويره صغيره حاخد غرزتين " وارجع وتبعها بدحكته المعتاده فى حديثنا وانتهت مكالمتى له وانا كلى امل ان يكون بخير قبل ان اعلم انه دخل فى غيبوبه واجرى عمليه جراحيه
نفس الشعور انتابنى حينما القى القبض على " عمر " ذلك الطفل الصغير الذى لم يتعدى عمره ال15 عاما من ميدان التحرير من قبل الشرطه العسكريه قبل ان يفرجو عنه بعد ذلك بيوم
ايضا هو زاته الشعور انتابنى عندما سمعت بخبر القاء القبض على "عبد الله شمس" دون ان اعرف الاسباب او حتى الجريمه الموجهه اليه وجلسنا مكتوفين الايدى نتابع ونترقب من بعيد جلسات التحقيق معه دون ان يكون فى ايدينا اى شئ نفعله
هو ذلك الاحساس ذاته ينتابنى الان عندما انظر الى عين " محمد امين " فى صوره التى تملاء صفحات الانترنت لا اجد فى مقدرتى شئ سوا الدعاء له وحتى الدعاء هل ادعى له بالشفاء ام ادعى بان ياخذ حريته المسلوبه ما اشبه حال محمود امين بمحمد محسن الاول محبوس داخل سجنه والاخر كان فى محبوس فى غيبوبه الظلم والتاخر الذى لاقاه فى العلاج
محمود امين يمتنعون عن علاجه . ومحمد محسن ايضا رفضه المستشفيات علاجه
محمود امين القى القبض عليه فى العباسيه . محمد محسن اصيب اصابته فى العباسيه
فى النهايه لااجد شئ افعله سوى الدعاء
اللهم لا تجعل مصير محمود مثل مصير محمد

الأحد، 10 يونيو 2012

محمود محمد امين

محمود محمد امين حسن
محمود محمد امين حسن 32سنة بكالوريوس تجاره من دراو " اسون " محمود من ضمن مصابين الثوره ومن ضمن الناس القليلين الى وصل بيهم الحال انهم يسيبو بلادهم ويروحو للقاهره عشان يشاركو فى الثوره حتى من قبل اندلاعها محمود انا معرفهوش ومشفتهوش غير مره واحده بس مع اخت الشهيد مينا دنيال لما كانو فى اسوان .
محمود فاقد البصر فى عينه اليمين زى ما واضح فى الصوره  الاصابه دى كانت يوم 25 يناير يعنى محمد يعتبر من اول مصابين الثوره محمود يومها اصاب بخرطوشه فى عينه وللاسف فى وشو كلو مما اثر على العصب الخامس عندو لكن مسيره محمود متوقفتش عند فقدانه للبصر لكن محمود بردو كان بيشارك فى الثوره بعد كده ونزل من المستشفى متخفى يوم موقعه الجمل عشان يشارك فى تامين الميدان وصد هجوم البلطجيه وفضلت اكتر من 20 شاظيه فى دماغو الدكاتره معرفوش يخرجوها لكن قوه تحمل محمود وصبره وايمانو بانه مستعد يضحى بحياته كلها مقابل ان مصر تشوف النور هو الى كان بيخليه يتعايش مع الاصابه دخل بعد كده محمود فى عمليه اخرى بعد ما كان الشظايه بتاعه الرصاص الموجوده فى الراس بتضغط على العصب الخامس وده الى بيسببلو صداع لا يمكن تحمله حتى بالمسكنات لحد لما جى دكتور فرنسى وكشف عليه واجرى لمحمود اول عمليه لاستخراج بعض الشظايه قبل اعتقاله باسبوع او اكتر قليل وكان المفروض ان العمليه التانيه حتكون بعدها باسبوع لكن محود تم اعتقاله بعد نزوله للمره التانيه من المشفى عشان يساند المتظاهرين فى العباسيه بعد هجوم الجيش والبلطجيه عليهم وبعد كمان استشهاد صديقه عاطف الجوهرى نزل محمود يوم الجمعه الا ان الشرطه العسكريه هجمت ليهم وده الى خلا محمود يهرب هو والى معاه لحد لما وقفوه البلطجيه وقعدو يضربو فيه والضرب كان فى عينو اليسرى وراسه وفى بلطجى منهم ضربو بالمطوه فى بطنو ده كله قبل ما الشرطه العسكريه تقوم باعتقاله وللاسف محود مبيلقيش اى رعايه طبيه فى السجن ده غير انو قام بالاضراب عن الطعام من يوم 5/25 اعتراضا على وجوده داخل السجن بدون اسباب محمود معتقل من يوم 5/4 وكل اما يتعرض على النيابه العسكريه بيتجددله حبس 15 يوم جدد دون النظر الى حالته الصحيه او حتى عرضه على طبيب مختص ومن يوم 6/4 ومحمود اضرب عن المياه كمان الا ان فى اخبار بتقول ان محمود فك اضرابه امبارح بس محمود لسه اوضاعو خطيره خصوصا الاصابه الى بالمطوه فى جنبو .
مشكله محمود فى منها كتير فى السجون الحربيه الى اصلا مش مخصصه للمدنيين السجون الحربيه المفرض انها معموله للى بيخونو الوطن لكن للاسف محمود والى زيو هما الى فى نظر المجلس العسكرى بيخونو الوطن المجلس العسكرى كان مبرره ان مفيش قضاء شغال ايام الثوره عشان كده كان بيقدم الناس للقضاء العسكرى دلوقتى القضاء المدنى يعمل بكفائه وكمان النيابه المدنيه تعمل بكفائه لكن من الواضح انكم انتو الى مش عاوزين غير كده .
اما النخب الى كل يوم تتكلم عن حق الشهداء والمصابين وان مينفعش تصوت لفلول لانك كده بتهدر حق الشهيد الا انهم لم يدعمو المسجونين فى احداث العباسيه حتى ولو دعم معنوى بالزياره حتى وانشغلو كلهم فى مسرحيه الانتخابات وياتون بعد ذلك ليكلمونا عن حقوق المصابين والشهداء تبا لكم ولاعلامكم .
حتفضلى لحد امتا كده يا مصر بيعا ولادك وولادك شرينك دايسه عليهم وهما بيبتسمولك

الأربعاء، 6 يونيو 2012

فى ذكرى سد الفرح وبدايه الماساه



هكذا تعلمنا فى مدارسكم
وهذا ما علـــمنـــاه خـــارجها

ابى كوم امبو by majek aswan
ماسكاجرو .
زى دلوقتى سنه 1964م فى المنطقه الجنوبيه من مصر كانت سنه حسم وصراع  بين  وجدان النوبيين وانتمائتهم للمكان وللوطن
هو الوطن ده هو هو المكان الى انتا عايش فيه ولا الوطن ده يعتبر المسمى  اما المكان الى انتا عايش فيه ده هو  الحاجه الاساسيه الى انتا على اساسها بتحدد وطنك او بلدك الى انتا منتمى ليه لما تكون انتا عايش فى مكان ويقولك ده وطنى  وبعد فتره من الزمان يتغير المكان الى انتا عايش فيه وتتغير كل حاجه حتى طبوغرافيه المكان حتى طريقه الحياه حتى الطقوس والعادات تلاقيها مختلفه ... اعتقد انك سعتها حتحن اكييد للمكان الاول كلامى حيكون ملموس اكتر للناس الى عايشه غصب عنها برا بلدها الاساسى مش بيبوصو على مصر على انها البلد بتاعتهم لا بيبوصو لمصر على انها الارض الى اتربو فيها عشان كده ممكن ميهمهوش كتير من مين مسك الحكم مين نزل قد ما يهمو ان عمارتو لسه موجوده وان حبايبو عايشين .
دى كانت زى توضيح بس ... فى الزمن المزكور اعلاه كانت هى سنه وضع حجر الاساس لبناء السد العالى السد الى بيعتبروه المصريين هو الى حميهم او انو هو سبب وجودهم فى الحياه وده الى قدر يوصلو ليهم النظام الناصرى فى التمجيد لافعالهم  ... وبالتحديد يوم 6/7 راح الرئيس جمال عبد الناصر للجنوب بالتحديد اسوان عشان يوضع حجر الاساس للمشروع  وانتهت من بناء المرحله الاولى فى نفس العام  طبعا مصر كانت كلها افراح ومكش فيه كلام غير عن السد الى حيحمى المصريين من الغرق وطبعا محدش فيهم فكر فى الى حيسببه السد ده من اضرار لناس تانيه او ان فى ناس تانيه ( النوبيين ) حتغرق لو فعلا المشروع داف النور حتى الرئيمال نفسو فى الوقت ش حط هو وحكومته تصور اساسى للى حيعملو فى الناس الى عايشين ورا السد دول .
لو تخيلت جدى وابويا كانو فين فى وقت زى ده حيكون جدى قاعد جنب الساقيه بيفتكر ايامه وهو صغير  لما كان بيجى مع ابوه لنفس المكان عشان يزقى معاه الفدان الى كل العيله المكونه من 7 افراد بتاكل منو . اكيد مش حيكون وارد فى زهنه او فى بالو انو ممكن يجى يوم من الايام والارض بتاعتو تتزقى من غير ساقيه او ان الميا  تترفع لدرجه انها توصل لبيتو اصلا مش تغرقو  وابويا اكيد كان حيكون فى وقت زى ده فوق نخله عشان ينط منها على النيل الى  فيه كل عيال  البلد  بتاعتنا بتهرب من جو  الصيف فيه وهو فوق النخلا بيعاير العيال على انهم مش قادرين يوصلولو الميا لحد فوق  فى النخلا مهما رشو عليه مكانش  متخيل ان فى يوم من الايام ممكن الميا توصلل للمكان الى هو فيه .
بعد مرور كل الزمن ده مبحبش اكلم ابويا او جدى عن موطنهم القديم عشان مشوفش الدمعه فى عيونهم  .
اكيد مهما مر  من زمن ابويا او جدى ممكن ينسو خطوه  مشيوها فى بلدنا القديم او حتى ينسو ترتيب البيوت او حتى عدد النخل الى كان فى اراضيهم

تابعونى على