الأحد، 15 أكتوبر 2017

معتقلى الدفوف



منذ اقرار الاستحقاق الدستورى واقراره لحقوق النوبيين لم نرى اى تطور او اى تقدم من جهة الحكومة او الدولة بشكل عام لتنفيذ ما نص عليه دستور2014 باعادتنا الى اراضينا فى مده 10 سنوات الامر الذي جعلنا جميعا غير مدركين نوايا الدولة تجاه عودتنا .
اعوم مرت كانت تحاول فيه الحكومة باستماته الالتفاف على ما نصه دستور الشعب تارة تمنح اراضينا للمستثمرين العرب الذين يملكون اراضى كثيرة فى منطقة النوبة القديمة مثل (الراجحي والظاهرة والوليد وشركة اللحاء ) وتارة تطرحها لمزاد تابع لوزارة الزراعه واخيرا تدرجها تحت المشروع القومى للمليون ونصف فدان 

وكل مرة كنا نواجه فيها الدولة ونطالبها بحقوقنا رغم اننا الطرف الاضعف متسلحين بدرع الحق الذي لا نملك غيره فنحن كنوبيين لا نميل للعنف او التخريب 
فى كل مرة كانت تندلع فيها احتجاجات للنوبيين كانت تكون ضد قرارات حكومة 
لم نكن نحن النوبيين يوما دعاة انفصال او تخريب 
استمررنا طوال عقود كثيرا بالمطالبه بحقوقنا بشتى الطرق والسبل السلمية السياسية التى يكفلها لنا القانون والدستور حتى يوم 3/9/2017
قامة قوات الشرطة باعتقال مجموعة من الشباب اغلبهم من اصدقائى

شعور غريب ومريب جدا يمر بي منذ القاء القبض علي مجموعة من اصدقائي علي خلفية اشتراكهم في مسيرة الدفوف النوبيه

جانب من الاخزلان والزل اعيشه بشكل دائم افكر كثيرا في اى طرق للخروج من الازمة ولكن الوضع يزداد سوء في والبداية قامة قواة الشرطة بالقاء القبض على احد الشباب بعد ان قام بعمل زيارة للمحتجزين مما جعل عدد المحتجزين من النوبيين يزداد ل 25 ولم يتوقف الامر عند ذلك بل في جلسه التجديد للشباب النوبي قامت قوات الشرطة بالقاء القنابل المسيلة للدموع واحتجاز 7 من المتضامنين مع المحتجزين الامر الذي يضعنا فى دائرة مغلقة ويصعب علينا الحل كما انه يوسع الفارق بين النوبيين من جهة والحكومة من جهة خصوصا بعد ان ظهر للجميع ان القضية اصبحت سياسية فى الامر العام .

شعور لن يوصف فبعد كل تلك التطورات نعيش نحن النوبيين حياة بائسة في البلد التى كنا ولاذلنا حتي الان نصفها باننا بلدنا الى اى مدي قل معدل وطنيتنا دون ان نشعر الى اى مدي اصبحنا نشعر بالخوف الخوف من احتجازنا لمجرد عرقنا او طبيعتنا وثقافتنا المختلفة عن البقية الاحتجاز لمجرد مجاهرتنا بالظلم الذي نتعرض له لن نتكلم عن حقوق النوبيين فى المجمل وهي عودتنا لقرانا الاصلية لا نريد من الدولة الا حريتنا

السبت، 31 ديسمبر 2016

ربنا معانا




فى حياة كل واحد منا لحظة كده اللحظة دى هى اللى بتحددله الشخص ده يستاهل انك تكمل معاه حياتك ولا لا وعلاقتك بيه فاشلة ولا لا اللحظة دى ممكن تكون بعد عمر طويل من انك تاخد القرار اقصد فى نهاية العمر والجواز والخلفة وممكن تكون فى المنتصف وممكن تعرف القرار ده من اول مقابلة اللحظة دى مش شرط تكون فى تصرف او طبع ممكن تكون فى حاجه ابسط مما تكون زي يديك منديل ملا بعد ما تخلص اكل مثلا او ممكن تكون فى طريقة قعدته قدامك تحس بيها بلامبالاه اتجاهك عشان كده ناس كتير بتعتمد على الفيرست ديت حتى لو مسمهوش باسمه بس هو فعلا بيكون كده 





ربنا يرزقنا واياكم بلحظة بدرى لحظة تقلل كل الخساير لحظة تكون زى النسمة تشفى القلوب وتريح المحتار ... وبعد ما تتالى اللحظات وتثبت الخطوات نصيحة متترددش لحظة فى انك تطور العلاقة سواء كانت بشكل رسمى او غير بس الفكرة كلها انك تكون من جوا راضى ومقتنع خطوبة او جواز هما مش معارك بتخوضهم دى سلالم بتطلعهم عشان كده خليك (رويح) خليك متساهل فى كل حاجه ممكن انك تتغاضى عنها او تكلبش فيها متستخسرش على نفسك مش على الطرف التانى عيش طول الفترة دى على اسااس انك (بتدى) بس متاخدش خلى نفسك ديما قدام نفسك فى الصفوف الخلفية كله حيبصلك بظهره بنظرة كلها سكسي ومليانه ضحك دى لوحدها بالدنيا واديك انتا كمان ارتحت لانك من البدايه مستخسرتش 




ربنا يجعلنا اغنياء ... بمال بقى بصحة مش حتفرق الغنى فى كل انواعه بيبان فى العين انك تبقى مكتفى مكتفى بكل حاجه مش تكون درويش يكون معاك بس الزياده تيجى متجيش متدقش 


ربنا يحبب فينا خلقه ... خليها منهم ديما الانفصال ، الزعل ،الخناق 


ربنا يجعلنا من الباريين .... مع كل الناس مع كل حد في يوم مدلك ايد مش شرط يكون ابوك كل جد قال كلمه صداها لسه بيرن فى ودنك حتى لو مش بتفتكره ديما ولو بتفتكر لحظات قاسيه من والدك افتكر ان محدش كامل " ديما بيقولو ان لو الشخص شاف نفسه كامل مش حيخلف لان الشخص بيتجه للخلفة عشان يكمل نفسه فى عيالة " كمل نفسك باولادك بحد محتاج نصيحة ونصيحتك حتفضل برده ترن فى ودنه ربنا يجعلك بار بيه 


خليها منهم من اى حد تعرفه خليك معاه وملازمه لحد اخر لحظة لحد ما هو اللى يقول كفاية وقتها امشى امشى ومتلتفتش انتا عملت كل اللى عليك . حب اللى يحبك حبه قوى ومتترددش كل يوم انك تقولها باغنية برسالة بمكالمة حتى ولو فى خاطرك اصحى الصبح وانتا فاكر انك بتحبه حتى ولو بسبب انه كل يوم بيعملك كوباية الشاى بحليب اللى بتكون محتاجها لحظات الكره حتى لو جت من لحظة والتانيه افتكرو الحجات الحلوة بينكم شوفو ايه اللى حتخسروه بكرهكم وقت ما تلاقو ان الخسارة متاعدلة مع المكسب فارقوه 


----------- 


ربنا يرضينا .... سعتها لما ده كله يحصل وتيجي فى اى ليله بتحط راسك فيها على المخده حتحس بالرضى الرضى اللى يخليك تسلم نفسك لنوم مرتاح حتى لو مش حتصحى تانى يوم سعتها خليك فخور انك وصلت للنقطة دى

الأربعاء، 2 مارس 2016

حداد مع الزمن

مازن . الماجيك . النزيه حداد


اغنية اسمر اللونا بكل ما تحمله الملحمة من كلمات وكل من اضافو اليها من العظماء 

ارتبطة بالتاريخ النوبى القديم والحديث وارتبط معها اسم النزيه حمادة حداد فبعد زمن 

سحيق سيستمع احفادنا لتسجيلات الاغنية فى قدة عابدين ويقفون باستغراب عند 

ضحك كل الحضور عندما قال العزيز غازي حداد مغفل كا يتسائلون لماذا هذه الضحك 

الكثير فى كل تسجيل للاغنية 


لذلك احكو لهم انه فى زمن ما كان هناك النزيه حماده حداد وكنا بنحب نالس عليه فى 

الكوبليه ده لينطلق منبع السعادة ضاحكا ويقول ربنا يسامحكم 


دمت لنا ايها النزيه ودامت ليالينا السعيدة وضحكنا الدائم على الكوبليه ده ودام ترديده فى كل عصر وزمان 


الخميس، 16 يوليو 2015

النوبة النسوية



بعيدا عن اي حد بيصنفنى تصنيف انا لم ازعم يوما انى تابع له مثل انى نسوى او اى شئ مشابه انا بشوف الامور من منظورى الخاص وبتضامن مع من اريد وبسخر من من اريد .... لذا لزم التنويه 

كثير ما يتردد على مسامعنا كون المجتمع النوبى مجتمع نسوى بالفطرة ولا اخفى عنكم انى كنت شديد السعاده لكوننا كنوبيين متفتحين ونصل الى هذه المرحلة من احترام الانثى كانثى لها طابعها وكيانها الخاص ومستقلة بعض الشئ ولكن ما لبث انبهارى فى التلاشى بعد تعمقى فى هذه الفكرة التى تشغل تفكيرى من فترة ليست بقريبة وبعد مناقشات كثيرة بينى وبين والدتى وبعض النساء النوبييات اكتشفت اننا لا نعى النسوية بمفهومها الشامل وان الرجل النوبى استغل نسوية المجتمع وكون المراه قائما بزاتها ليزيد من الحمل عليها ويزيدها الكثير من شئون الاسرة . 

من بداية ادراكى لما يحصل حولى وانا ارى امى مسئولة عن كل ما يخص المنزل ومن بالمنزل امى مسئولة عن ملابسي وعن اكلى وحتى نوع عطرى وتواجد تلك المستلزمات فى المنزل والموضوع لا يقتصر معى فقط ولكن مع كل من بالمنزل حتى والدى فوالدتى مسؤلة عن ملابس والدى بشكل  عام من الشراء الى المكوى .


نحن استنزفنا النساء فى المجتمع النوبى حتى اصبح المجتمع بالكامل نسائى فالرجل لا يساهم الا ببضع من الاوراق المالية والتواجد بالمنزل هذا ان لم يكن يعمل بالخارج فحتى الاسر الغير مقتدرة والتى تعمل فى الزراعة كملاذ وحيد فى النوبة تكون المراه هى المسئولة عن الزراعة وعن المحاصيل وفى هذه الحالة يختفى حتى تواجد الرجل بالمال فيبقى فى المنزل كاى طفل رضيع ينتظر كل شئ حتى يصل تحت قدمه 

.
كل التحية لوالدتى وكل النساء النوبيات الحاضريين والقادمين اشفق عليكم ولا اتفاخر بكون المجتمع نسوى بقدر ما اشفق عليكم لما انتم فيه 

المقالة تحت التحديث ,,,

الأحد، 17 مايو 2015

الوشم الافريقي


عارف لما تكون مرتبط بمكان لحد الجنون عارف لما حبك ليه يوصلك لانك تبقى ايقونة ليه فى اى مكان بتمثلك فخر وزهو وممكن تقف قدامها نص ساعه انتباه طب ايه رائيك بقى لو عرفت ان فى ناس بتعمل كده واكتر ان فى ناس من كتر فخرها بانها تتنتمى لمكان عندها استعداد انهم ياخدوها معاهم فى كل جته حتى تحت الجلد هو ده اللى بتعملو الناس اللى بتحب قارتها بجد هو ده الللى بتعملو الناس الللى بتحب افريقيا تلاقى ناس زرعاها على رقبتها وتلاقى الللى زرعه على كتفه وتلاقى اللى حاطه على صدره هو ده الوشم الافريقى




الوشم حاجه قديمة جدا يمكن من قديم الازل وتنحصر بدايتها بين شعوب المايا وقبائل افريقيا فى الجنوب
الوشم فى افريقيا مش مجرد علامه مميزة ومش شرط يكون رمز القاره الوشم فى افريقيا بيبقى لحجات كتير بتتمثل مثلا زى واحد بيوشم الاله اللى بيعبده عشان يحميه فى حياته ويبعد عنه الاشرار ممكن يرسمه عشان رمز قبيلته وفى قبائل بالنسبةليها الاعتراف بالراجل بيتم بعد ما يعدى مرحله الامه من رسم الوشم وكمان فى قبائل بتوشم المراه بعد الجواز كنوع من قدسيه العلاقة بين الزوجين طقوس بعض القبائل وهى بترسم الوشم لاحد رجالها ولا نسائها لوحدها كفيلة بانها تجعلك تخاف من العمليه كلها البخور او الدخان المستخدم وتمتمت كبير القبيله او الراهب او الوسيط الروحى بين الارواح وازيز باقى اهل القبيله مع قرع الطبول الخفيف المتتالى تحس انهم حيقومو باعدام حد منهم مش مجرد وشمه وده اللى بيبين اهميه العمليه دى عندهم ومش شرط ان يكون الوشم عباره عن طريقة الحقن اللى يعرفها معظمكم لكن فى افريقيا ولان الموضوع ده قديم جدا يمكن من قبل ظهر الاصباغ كان بيتم الرسم على الجسد او الوشم عن طريق ايذاء الجلد او حرقه او حتى عمل جروح فيه ومع التأم الجروح دى بيظهر المعنى الاساسى للوشم فى قبيله من قبائل السودان بيتم جرح خدود المراه تلات شرط جنب بعض او اتنين على الخدين عشان تشكل ابتسامه حلوه للمراه او بمعنى اصح تبرز النغزه اللى بتظهر جمال المرآه لما تضحك  ,
 وكمان من ابرز واشهر القبائل اللى عندهم الوشم يعتبر سنه الحياه زيه زي الميا والهوا قبيلة "هوسا" دى قبيله فى نيجيريا وتعتبر من اشهر القبائل فى افريقيا وبتتواجد القبيله دى فى نيجيريا وتشاد وجزئ منهم موجود فى السودان القبيله رغم تعلقها بعادة الوشم الا انها كانت من القبائل اللى ساهمت بشكل كبير من انتشار الاسلام فى المنطقة الافريقية

فى النوبة  كانت الستات تدق على شفايفها تصبغها لون تــاااانى , فى الصعيد كان الرسم على دقن الست ,
مكنش حد بيتغرب ولا بيستنكر ولا بيمص شفايفه

الفكرة كانت مقبولة اجتماعيا لا دى محبوبة اجتماعيا مش مقبولة بس
بس دلوقتى مجرد انك تعمل كدا , تلاقى أمة لا اله الا الله بتتفرج وتتحاكى عليك
بس ما يهمش اللى بيدق وشم
عارف كل دا
عارف ان ان  انتمائه للرسمه اللى رسمها بيساوى انتمائه للحياه لدرجة انه حياخد وشمه معاه لتحت
يوم ما يتحاسب على الوشم دا ,
جربت تعمل كدا

؟؟؟




الخميس، 31 يوليو 2014

السيكاريو


السيكاريو المواصله المعتمده فى العيد 
اول يوم العيد الصبح وبعد الصلاه والمديد والذى منه من بلح و كحك وبيتفور والجيب العمران من الفول السودانى والترمس وفوق كل ده العيدية نتلم كلنا عند ناصية 9 وكل واحد بيتفاخر بملابس عيده الجديد سواء جلبيه او بنطلون جينز بحزام عشان يشيل المسدس عشان نبدا انطلاقنا الى ابوسمبل وميدانها معقل العاب العيد ومستوطن اطفال القرى المجاورة .
كلنا نركب العربية الكارو بعد ما ننقى اقوى حمار واحسن كارو وسواق عشان ننطلق بسرعه للمكان المطلوب وطول الطريق نصقف ونهلل بالمقوله المتوارثة (سيكاريو يا سيكارو سوقنا مافيش زيو ) وتتعالى الصيحات فى سباق بين الكوارى :) وبعضها للوصول اولا وامتاع الراكبين للحصول على اعلى قدر من الاموال نبدا بعدها تجوالنا بين الالعاب ومحلات الاكل وما لز وطاب منه وبعد قداء نصف النهار نلوز بالعود ونحن جميعا منهكين القوى الى منازلنا ونغوص فى نوم عميق بعد ان نكون افرغنا كل ما نملك من نقود وفول وترمس ولم يتبقى الا المسدس الموجود اسفل السرير وبداخله اخر اسطوانة طلقات :D

السبت، 10 مايو 2014

المثلية الجنسية




محدش بيختار ميولة الجنسية زى حجات كتير مبنختارهاش زى الاسم مثلا طبيعة المجتمع بتفرض علينا قوالب للتنميط زى مثلا الشعر الطويل للبنات والقصير للولاد وطريقة اللبس وكل حاجه 
كونك تبقى مثلى للجنس دى مش حاجه سهل كده ولا بسيطة زى ما معظم الناس ما متخيلة ان دى مرحلة قبل الزواج وتفريغ للكبت 
جربت انك تكون عكس التيار طول حياتك تبقى جوا بيتك مرتاح فى لبس محدد فى طريقة كلام معينة لكنك متقدرش تجاهر بده فى العلن وبتضطر تخشن او تقوى صوتك فى مكان العمل وفى الشارع لمجرد ان ميتقالش عليك منسون او يتصرف معاك الناس بتصرفات بغيضة 
جربت انك تستحمل كلام الناس لفترات واسالتهم ليه ما اتجوزتش هو ازاى الولد ده صحبك للدرجة دى هو انتا ليه بتمسك ايده كده ليه حطيتلو الرنة دى على التليفون 
جربت نظرت ابوك وامك ليك لما يشكو فى تصرفاتك ويكلموك على انك مش طبيعى " طب ايه الطبيعى من وجهة نظرهم " 
انك تمشى مع بنات ان موبيلك يبقى مليان بحبيبتى وروحى 


Daayiee عبد الله

عبد الله من 4 ائمة مثليين فى العالم ومن مؤسسين مؤسسة الفاتح للعمل مع المثليين جنسيا ويعمل على نبذ العنف ضد المثليين جنسيا من المسلميين

زمان كان بنسبالى المثلية الجنسية بتسببلى بعض القرف لما اشوف ولدين بيتبادلو القبل لكن بعد قرائة فى الموضوع ده من منظور انسانى بحت بعيدا عن الاديان ولانى مقتنع اننا كبشر نستطيع ان نحدد ادميتنا بشكل كامل اقتنعت كليا بان المثلية ده حق وميول من الولاده مش شذوذ ولا قرف 








Macklemore & Ryan Lewis - 'Same Love"

الموسيقى والفيديو عن "Same Love"، من إخراج ريان لويس و جون جون Augustavo والتي تنتجها تريشيا ديفيس، لاول مرة على حساب يوتيوب لويس في 2 أكتوبر، 2012، وتراكمت 350،000 مشاهدة بعد 24 ساعة لاول مرة. اعتبارا من أبريل عام 2014، كان شريط الفيديو أكثر من 115 مليون مشاهدة. الفيديو، بيحكى قصة شابين بيحبو بعض ومواجهة المجتمع ليهم من اول الناس ونظراتهم فى الشارع لحد والدهم وبينتهى بالزواج بينهم وتقبل الناس للخبر على امل ان يتم تعميم تجربتهم وتقبل بيهم باقى الكنائس
مش شرط ان المثلى يكون بيحط روج ويلبس ملابس حريمى او يتصرف تصرفات تشبههم لكن ممكن يكون المثلى واحد عادى زى وزيك التنميط اللى بيخلقو الاعلام والميديا والسينما للمثلى فى حد ذاتها تجريح ليه وده اللى تلاشاه ريان لويس فى الفديو الاصلى للاغنية .






هارفي ميلك اتقتل سنة 1978


اشتغل اخر 8 سنين في حياته على قضايا المثليين في امريكا وهو اول واحد مثلي امريكي يكون في منصب زي رئيس الحي الناس مكانتش قبلاه وبدأو عليه بحملات هجوم عنيفه لكنه نجح


نجح كمان في اصدار قانون لحماية المثليين في امريكا كلها



المثلية الجنسية الذكورية فى وجهة نظرى اعقد كتير واصعب من المثلية الانثوية فعلا بنلاقى ان المجتمع بيتقبل حتت ان المراة مثلية وبيرجع ده الى تاخر زواجها او شهوتها الكبيرة وده يمكن اللى ديما بناقيه فى ردود مدونة يوميات امراة مثلية
على العكس المجتمع بيعتبر المثلى الذكورى شئ لا يقبل تماما حتى بعيدا عن الدين بالذات المثلى الملقب بالرمز - عن الملقب بالرمز +
كونه دائما يكون اسفل او دائما ياخذ وهذا الرد فعل مبنى من ذكورية المجتمع وعدم تقبلهم لذكر ياخذ او ذكر - بينهم 

ذكرى وتضامن لمعتقليين الكوين بوت وكل المثليين المطهضين فى مصر والعالم

الجمعة، 9 مايو 2014

التعليم بالغصب




عارف لما مثلا تتمسك بحاجه لحد الجنون او لحد ما تخليها السبب فى كل حاجه بتحصل فى الكون .هو ده اللى بيحصل لما الناس تتمسك بالدين او بمعنى اصح تلعب بالدين لمكاسب شخصيه او حتى لو كانت مكاسب مجتمعية .لما تستغل جهل الناس بامور الحياه وامور الدين وتستخدم منحه اعطاها ربنا لك عشان تدمر بها وتوصل لغرضك الشخصى هو ده اللى عمله محمد يوسف مؤسس جماعه بوكو حرام " الفيزياء والكيمياء من أعمال الشيطان، وأن المطر مخلوق من مخلوقات الله، وليس كما يقول الكفار والملحدون في علومهم، إنه ناتج عن تبخر المياه وتحول البخار الي سحاب ثم تحوله الي امطار في ظل ظروف مناخية مواتية."

دى كانت شطحة من شطحات المعلم الكبير محمد يوسف واللى استهل بها نشاطه ونشاط مجموعته عشان يسعو فى شمال نيجيرا ويبعثو فيها فساد بس طبعا عشان واحد مجنون زى ده يقدر انه يسيطر على دماغ مجموعة كبيرة من الشباب ويخليهم يؤمنوا بافكاره الهبلة دى لازم يكون المناخ الاقليمى مساعد .

نرجع بالزمن شوية لورا فى نيجيريا فى الشمال فى ولايه اسمها بورنو الولاية دى كانت ضمن امبراطورية " كانم بورنو " سكان الولايه كانو من اوائل اللى امنوا بثورة المهدى اللى كانت سعتها فى اوج انتشارها من السودان وراحوا كمان اعلنوا انهم حيلجأوا للحكم الذاتى وده اللى اثار سخط وغضب المستعمر اللى بينط زى الخازوق فى اى حاجة ممكن تهدد بقائه او سيطرته على البلد. البريطانيين لعبوا لعبتهم و راح وقفوا فى صف عثمان دان فوديو اللى بدا سعتها فى تأسيس الخلافة بنظام اسلامى فى ولاية سكوتو سنه 1809

حتقولى طبعا ايه اللى جاب القلعة جنب البحر ايه اللى جاب سكوتو اللى فى الشمال الغربى لبورنو اللى فى الشمال الشرقى حقولك اسأل المستعمر طبعا المستعمر عشان يقدر يجنى كل الثمرات من البلد كلها كان مقسمها لاقاليم وكان الشمال كله واخد البلد بالعرض اسمه الاقليم الشمالى حاجه كده زى اللى كانت قبل عمك مينا فى مصر المهم ان صحبنا عثمان دان مكدبش خبر وبمجرد ما عمل نظام الخلافة راح مستبعد كل الشباب التابعين لبورنو من الحياه السياسية فبل ما يتطاول ويطردهم من الاقليم كله، مش بس كده ده بعد كده منعهم من الدخول فى مفاوضات الاستقلال وده اللى زعل طبعا الشباب اللى كانوا بعد خروجهم من الاقليم او بمعنى اصح انحصارهم فى خندق فى الشمال الشرقى للبلاد. وفى سنة 1993 ظهرت تانى حاجه بتأخر تطور البلاد بعد الاحتلالات وهى الحكم العسكرى لما الجنرال ساني أباتشا واستولى على الحكم في نوفمبر عن طريق انقلاب عسكرى الماركة الافريقية المسجلة الراجل ده مطولش فى الحكم ،لكنة رسم ملامح جديدة لنيجيريا بتحويل الحكم من عسكرى لمدنى وبنقل الحكم من الشمال الاسلامى الى الجنوب لدرجت انه افسد مؤسسة التعليم اللى فى الشمال عشان يقدر يسيطر على الناس بعد ما يصابوا بالجهل لكن بقى زيادة الجهل جهل بتتقلب من ناس مبتفهمش ف بيتحكم عليهم لناس مبتتفهمش فيقاتلوك وده خلي بركان داخل بورنو يفور وطلع الشباب من كل حته وطلعوا مرة واحده وقدروا انهم يعملوا انقلاب و يحكموا البلاد لمدة 4 سنين من سنه 1999 ونجحوا فى انهم يطبقوا الحكم الاسلامى فى 12 ولاية، لكن ده برده مساعدش فى تطور البلاد ولا حتى فى القضاء على الامية اللى وصلت لنسبة 98% فى ولاية بورنو، ده غير طبعا تفشى الامراض اللى كانت اصلا مش موجوده او القضاء عليها فى العالم كله كانت وصلت فى نيجيريا لمرحلة الوباء زى الكوليرا والطاعون وده تسبب فى موت مئات الاشخاص نتيجة انعدام المياه الصالحة للشرب.
كل اللى عدى ده هو اللى شكل التربة الخصبة لمحمد يوسف انه يشكل جماعة بوكو حرام اللى بتعنى فى لغه الهوسا القبيله اللى بتسكن منطقة بورنو "التعليم الغربى حرام " مستفيد من تجاهل الحكومة و الامراض المنتشرة وكمان جهل الناس و لجوئهم للدين وده اللى عرف يوظفه محمد يوسف صح وبعد ما محمد سلح الرجال وغذى عقولهم بفكره السام من ان التعليم الغربى كله عبارة كلام كفار ومسحيين لا علاقة له بتعليم الله ورسوله وبعد ما اعلن انه شق من طالبان وان ليه علاقة بتنظيم القاعدة فى افريقيا بدا فى تنفيذ هجمته ضد المدنيين والعسكريين والحكومة والبريطانيين وفى ولاية يوبة سنه 2009 نفذوا ساعتها هجمة على مركز للشرطة بدرجات نارية و باقواس وسهام وشغل عنتر ابن شداد يوم 30 يوليو بالظبط واللى بعدها قامت الحكومة بحمله اعتقالات للجماعه واللى كان من ضمنها محمد يوسف اللى تم اعدامه بدون محاكمه الحكومة سعتها كانت فاكرة انها كده بتقضى على الجماعه دى للابد لكن اللى حصل العكس اعدام محمد يوسف والاسلوب الوحشى اللى كانت بتتعامل بيه الشرطة مع عناصر الجماعه هو ده اللى خلاها تكسب ارضية فى الشارع نفس اللى حصل مع الخرفان وزادت قوة الجماعه وبداو فى تنفيذ العمليات فى مناطق متفرقة لوقتنا الحالى
(نشرت فى 9 مايو 2013)


تعديل اضافى :-
23 ابريل 2014 خبر فى بى بى سي بيقول عصابات تحارب بالوكالة لصالح بوكو حرام فى نيجيريا
وفى سؤال للمراسل لاحد اعضاء هذه العصابة بهل انتم مؤمنون بالافكار التى تتبناها بوكو حرام افادو فى صوت واحد " لا ولكنا نفعل ذلك من اجل المال"
بوكو حرام فى الفترة الاخيرة ومن متابعة اعمالها ونشاطاتها حنلاقى ان فى تغير فى سياسه الحركة وده اللى بيخلينا نعرف اكتر انها لا تمثل الاسلام او المسلمين فى نيجيريا اما عن سبب الحدث الاخير بتاع خطف 200 فتاه من المدرسة وقتل الطلاب الذكور وبعدها كمان اعلانهم انهم حيبيعو البنات دى فى اسواق الرقيق وعن سبب هذا الفعل قال د/ باوا عبدالله ان السبب يرجع لرغبة بوكو حرام فى لفت انظار العالم ولو كان راى باوا عبدالله صح فاعتقد انها نجحت فى ده لكن انا كان لى رئي شخصى فى الاسباب ومنها هو الخبر اللى نشرتو فى البداية
" معظم مقاتلى بوكو حرام الان من المرتزقة الذين لا تجزبهم عقيده سوى الاموال وبده ابرر سبب رغبتهم فى بيع البنات وخصوصا ان كل عملياتهم السابقة كانت بتكون قتل كل من يقابلهم وعدم اخذ اسرى الا من الاجاب او اصحاب النفوذ ومن تحليلى للموضوع كمان ان فى خلال الفترة اللى جيا حنشهد انقسامات كتير داخل الحركة بين الوافدين الجدد المتمردين وبين اعضاء الحركة الاصليين
- كمان نقطة ضوء على اللى حصل ممكن نسال نفسنا سؤال جدى من الممول الرئيسي لهذه الحركات المسلحة
"

الخميس، 13 مارس 2014

بدايات 2

فى بدايات حكيت عن بداية وعى باللى حوليا وبدايه تشكيل الذكريات اللى بحاول ومش عاوز انساها ديما بعد مرور الزمن والحقبه اللى اتكونت فيها الذكريات دى اضطرينا اننا نسيب البلد لظروف عمل الوالد وننتقل لبيئة تانيه ومجتمع جديد بيئة المدينة والسكن فى عمارة على قد اختلافها على قد ما كان كرهى ليها الكره اللى بدا يقل مع مرور الزمة واللى تحول بعد كده للوصول للشخص اللى قدامكم ده اختلاف البيئتين كان صادم بالنسبالى رغم صغر سنى لكن الاختلافات الكبيرة اللى كانت موجوده واللى مكنتش بقدر استوعبها كويس حتى فى طريقة شرب الميا بعد ما تحولت من الثلاث زيار اللى فى وسط الحوش للتلاجة والقزازة او الحنفية مباشرة وده اللى حولنا نمحيه وجبنا بعد فترة بسيطة من انتقالنا للقوالب الحجرية الجديده اول كسر لحياتنا المدنية وهو الزير ده
وجودى فى المدينة وسط ناس من كل حته فى المحافظة كان بيزيد من شعورى بالغربة لكن بدات تزول بالتعرف عليهم ولان سنى كان اكبر من سن القبول فى الحضانه كانت المفاجئة انى حقضى النهار لوحدى فى البيت من غير ولدتى اللى بتشتغل واخويا اللى بيروح المدرسة واخويا الاصغر اللى بيروح فى حضانه خاصة
ومن هنا بدات صداقتى التانيه مع شريط الاغانى السودانيه اللى مش فاكر شكلو لانه تقريبا مكانش بيطلع من الكاسيت ومش فاكر كمان من الاغانى غيرها لانى مكنتش بسمعها الشريط كان شريط الاغانى الوحيد اللى تملكه والدتى واللى اصرت انه ينتقل معها للمدينة والمره دى كان اللقاء مع اغنية " حمام الوادى لحمد الريح "
كان اليوم بيبدا بدرى من الساعه السادسه صباحا فيتوجه ابويا واخويا واحد للشغل وواحد للمدرسة ووالدتى تقعد معايا شوية قبل توجهها للعمل وتبدا فى تحضير الفطار ليا عشان تسيبو معايا وعشان مستخدمش المطبخ فى غيابها
وبمجرد خلو البيت ببدا فى اخراج الكاسيت اللى مكانش بيتحرك من مكانه فى غرفة الواد واتوجه بيه للصاله واشغل الاغنيه وابدا فى الانصات والفرجة على دوران البكر داخل الكاسيت
لما بيبدا حمد كلامه ويقول " تقول لى ماشي من بكرة " تبدا تظهر صورة والدتى وهى تحت العمارة وانا بشاورلها من فوق البلكونة وانا قاعد على كرسى العجلة الزرقة بتاعت اخويا
وبعدها ارجع لحتت " صغارك مشتقين ترجع تضم العشب بحنية " وافتكر اخر قفله للباب ومامتى خارجه منو وانا من قبل ما تسيبنى اصلا وحشتنى 
يرجع حمد عشان يهون عليا ويقول " مش انتا القلت ما بتروح " على اساس انى ممكن اقسى على امى واقول انها بتكدب او اصدق واستنى عودتها من الشغل 
ويجى بعد كده لحتت " بلادك حلوه ارجع ليها " ودى كانت بتتربط معايا على طول بطرقنا للبلد وخصوصا المكان اللى بعد ادندان لما تلاقى الخضرة من الجنبين خصوصا فى قول " تلقى الخضرة بتغسل هم بياض ورد الضفاف الزاهيه "
من كتر مكانت الاغنيه بتاثرنى وبتوصف حالتى من كتر ما كنت بعيدها لدرجت انى مش عارف ايه الاغانى اللى كانت معاه فى الشريط
مرة الايام ومرة الظروف وزى ما فارقنا بيتنا اللى فى البلد فارقنا كمان حياتنا فى المدينة وانتقلنا لمكان جديد حاليا لا تربطنى بيه الا السفر الكتيير وتحول لقب حمام الوادى من امى لى انا ومن ساعتها وانا تقريبا كل اجازة اغنيلهم الاغنية دى بصوت عالى يمكن عشان اربط بيها ذكرى جديده فى ازهانهم او عشان يفتكرونى فى غيابه اخر مره امى قالتلى ايه اللى انتا بتقولو ده وخصوصا عند كوبليه "
بلادك حلوه ارجع ليها دار الغربه مابيرحم "
وعلقت بان صوتى وحش قوى وبغنى بصوت عالى سعتها سالتها انتى فاكرة الاغنيه دى ولما بدات احكيلها حكايتها اللى كانت فى ذاكرتها عباره عن فتات من الذكريات استغربت قوى لما لقتنى فاكر كل ده بالتفصيل سعتها رديت وقلتلها انا بحارب عشان منساش وفعلا ده اللى بيحصل دلوقتى

" ملوك العزه مابتندم "

الأربعاء، 12 مارس 2014

بدايات

كتير مننا ممكن مش فاكر امتا بدا يوعا على الحياه وامتا بدا يلمس الحياه ذكريات بدايه الحياه دى كانت بالنسبالى هى الكنز اللى بحاول ديما افكر نفسي بيها وبحاول انى اعيشها وانا مغمض عينى عشان متزوغش عنى تفاصيل ومنا التفصيله الصغيرة اللى متجسده فى اغنيه الذكرى المنسية
بدايه النضوج والوعي وتشكل الشخصية بتاعتى
كانت على الذكرى دى
بالظبط فى شارع 3 وقت ظهرية
وكل الناس مستخبية من حر الصيف فى بيوته
واحنا عند عمتى عيشة فى بيتهم اللى على ناصية الشارع
وباب الشارع مفتوح وحارسة الدار ستو هجلة فى وش الباب
على حصيرها الاخضر وجنبها الكوز اللى بتبصق فيه ريق المضغة
وكلنا على الاوضة اللى على اليمين على الكنب
والتسجيل محطوط على الشباك اللى فاتح على الحوش
وراوية وعمتو بيحضرو الغدا وببوسى راح يزقى البقار ويعديهم الترعه
قاعدين انا وحمو والشريط ده شغال
النور الجيلانى سعتها مكنتش اعرفو بس كنت بتمايل على اغانيه بس هو حيفضل مفكرنى بالمكان والزمان والاشخاص
ولما كان بيبدا يقول"  بتعدى مواسم وتروح " تلاقينا كلنا بصينا لبعض واندمجنا من جديد " المسافة بعيدة بعيدة بعيدة " وكان كل واحد فينا كان عارف ان الزمن لما يمر حنشتاق لساعه فراغ زى دى نسمع فيها اغنية زى دى كاننا كلنا كنا عارفين ان مع مرور الزمن حيستحيل تكرار قعدة زى دى واحنا بكل اسى بنقول " مليانه خطاوى وبمشيها "
اعترفنا باننا حنستسلم للحياه دى وحنسيبها تجرنا عشان " الفرقة بتبقى ابدية "
كل واحد فينا انجر لحياته والبيت بعوامل التعرية اتهد وكل واحد مننا بقى فى بلد 
هجلة اتوفت وهى سيبالنا ذكرى بنفتكرها ونضحك على مواقفها
لما يرجع يقول " لا فرح بدونك بتفيدنى لا قلبى ولا بيلقى الراحه "
ومن سعتها واحنا فعلا بندور على فتات الفرحة 
بنلاقيها سعات فى فرح زى فرح راوية او ولادة فطومة 
ولحد دلوقتى كلنا بنبحث عن الراحه
" الغنية حزينة حزينة مليانه محنه واغنيها "

الاثنين، 13 يناير 2014

اختى المتمردة

اختى المتمرده اللى لولا تمردها كان زمنها اختى شقيق لان للاسف تمردها خلا يحصل خلل فى الجينات ومطلعناش اخوات


ديما لما يبتدى حوارنا او نتكلم فى حاجه كتبتها تقولى هو انتا مبتكتبش عنى ليه كان سعتها ديما بيكون ردى واعترافى انى مبعرفش بجد اكتب عن الناس اللى قريبه منى بالشكل اللى يخلينى مرضى عن اللى كتبته وتجربتى الفاشلة فى مدونة الناس اللى بتغير طعم الحياه ومدونة بوش اكبر دليل عشان كده ومن قبل ما اكتب خليكم عارفين التدوينة دى ناقصة .....
من حوالى سنتين وده الغريب لقيت اكونت بيكلمنى وعاوز رقم تليفونى عشان عاوزنى فى موضوع بعت رقم التليفون وبدا الكلام احنا كنا عاوزين مساعدتك فى شغل حنعملو سوا طبعا وفقت وحددنا ميعاد ومكان اللقاء الاول اللى من سعتها اللقاءات متوقفتش ومش حتتوقف فى الاول العلاقة كانت مجرد عمل لحد مره واحده كاننا اتضربنا فى الخلاط بقت حياتنا وحده هى يعنى احمد واحمد يعنى هى خروجتنا مع بعض وبنرجع نكلم بعض تحركتنا كل واحد فينا عارف التانى بيتحرك ازاى وبيعمل ايه من غير ما نكون مع بعض اقدر انا دلوقتى اقولكم هى حاليا بتعمل ايه بالظبط هى دلوقتى حتكون بتغنى وهى عماله طالعه داخله من اوضتها للمطبخ تبص مره على اللاب وحاطة الموبيل فى الشاحن عشان ميعاد خروجها للشغل قرب .
علاقتنا كانت مختلفة بشكل كبيير فعلا انا عمرى ما شفت صداقة بمعناها الحقيقة الا مع البنت دى بصارحها بكل حاجه وتعرف عنى كل حاجه زى ما انا كمان اعرف عنها كل حاجه من غير ما تحكى ولا حتى تتكلم بس هى احساس يمكن ضربت الخلاط دى خلت روحنا واحده لدرجة ان مودنا ممكن يبقى معكر سوا وسعتها لو اتقابلنا تعالا شوف بقى الاحباط اللى بنبقى فيه لكن مجرد ما نخلص نزولنا نبص لبعض والضحكة ماليه جسمنا قبل ما تظهر على شفايفنا ونسلم على بعض او مش مهم نسلم حتى لاننا عارفين اننا حنلتقى تانى ....
حتفضل القصة مستمرة وحفضل انا وهى واحد حتى لو اختلف مكانا

الاثنين، 16 ديسمبر 2013

المديد

الاكلة دى كانت مرتبطه معايه بكل عيد صغير "عيد فطر يعنى" كنا كلنا وبعد الصلا على طول نروح على بيت عمتى سميرة عشان ناكل المديد هناك المكان اللى بتسبقنا ليه امى عشان تساعدهم فى تحضير الوليمة الست دى كان ليها دقت نبر تحلف بيها كل توشكى مديدها بيطلع كله حته واحده مفيهوش كلكعه من اول ما اتعلمت المشى وانا بصلى العيد فى الجامع بطلع انا وابويا واخواتى كلهم على جامع شارع 11 هناك بنلاقى الناس بتبدا بترديد تهاليل العيد وديما بيكون المكتبه هو مكانه الثابت كل صلاه عيد وبعد الصلا بنطلع كلنا نعيد على بعض ونروح كلنا على بيت عمتى عشان نفطر من اديها احلى مديد وبعد ما انتقلنا للمدينة بقى اشتياقى للمديد يزيد كتير كانت امى او عمتى لما انزل البلد فى مره تعملى مديد لكن كان طعم مديد العيد ميتقارنش ابدا باى مديد تانى اصلا حالة انك من يوم الوقفه تقعد تخطط وتحجز اللبن وتجيب الدقيق توديهم كلهم البيت وعمتى من بليل تجهز الحله والنبر ده كله ميتوصفش وبعد ما عمتو تعبت شوية كنت فاكر ان كده خلاص مش حناكل مديد تانى او ان سلسله المديد اتقطعت لكن اللى حصل غير كده لما العيد اللى وراه لقيت بنت عمتى رقية هى اللى بتعمل المديد فى البدايه كنت متخوف من طعم المديد اللى حيطلع من تحت اديها وانه ممكن يبوظ عليا فرحة عيدى وذقت اول لقمة عن مضض وانا بتترق حتى على طريقة فرد العجينة فى الصحن لكن لقيت ان الطعم ما اختلفش كتير اينعم هو مش زى بتاع عمتو بس هو كمان مديد يستاهل انتظاره من عيد .......... لعيد ........ 

ربنا يحفظك لينا يا عمتو ويخليكى لينا يا بنت عمتو

الأربعاء، 4 ديسمبر 2013

سن ناب





كل واحد مننا بيحس ان فى حاجه معلقاه كده بالبلد والارض والاصل اللى اتخلق منه وفيه ومع استمرار الحياه وتغير المعالم وكمان تغير طباع المجتمع بتبقى مشتاق لتفصيله صغيرة تربطك بالمكان اللى انتا منه وعشت فيه طفولتك وكمان الناس اللى كانو سعداء بوجودك وسطهم كلنا بنخاف للزمن يغيرنا لكن بمجرد ما يبدا التغيير بنستسلم للموضوع من اول لمسه للتغيير ده لكن ديما بتبقى حاجه فى ذاكرتك بتفكرك بنفسك بالبدايه باول معركة ليك باول كلمة نطقتها واخر علامه سابها حد عزيز عليك
هو ده اللى بيحصل كل مره بطلع فيها من البيت بلاقى اللى بيلمسنى واللى بيفكرنى ديما باصلى واجدادى " سن ناج " مش مهم الاسم اتقال صح ولا غلط المهم ان هو ده اللى بلمسة سنيين كتير ويمكن من اول ما وعيت وعرفت اميز الحجات والبتاع ده متعلق ورا باب شقتنا من كتر ما اتعوددت عليه بقيت متعود ان صوته يطلع ديما مع صوت قفلت الباب او فتحته كل مره ببص فيها عليه وانا نازل بفتكر كويس اوى انى نوبى بحمد فيها ربنا وبقول بعدها يا مسهل عشان ابدا رحلتى بعدها فى المدينة الصاخبة واقابل الاشخاص الغريبة وبمجرد دخولى البيت بليل اقفل الباب بهدوء عشان ميصدرش صوت يزعج باقى اسرتى النيمين وابص عليها واقول الحمد لله لانى وصلت بيتنا
كل لما اسال امى عن سبب وجود الشئ ده ورا باب بيتنا تقول بكل اريحية وهى بتفتكر الماضى ده بتاع ستك الله يرحمها الستات النوبيين زمان كانو بيلبسوه كجزئ من الزينة وبمجرد ما تلاقيه متعلق على الصدر تعرف على طول ان الست دى جزئ مننا تجرى تشيل منها سبت الخضار من اول الشارع او توقف الكارو وتركبها معاك ولما الزمن اتغير والمكان اتغير و نقلنا للاقامه فى اسوان امى منسيتش تاخدها معاها واتغير مكانه من صدر امى لباب البيت و فضلت فتره طويله متعلقه على باب بيتنا فى اسوان وكل فتره امى تنضفها عشان الفضه تلمع كانها بتلبسها لكن الواقع ان مش امى بس الى كانت لبساها كلنا كنا لبسينها الحاله اللى كانت بتعملهالى لما افضل فتره باصص عليها وسرحان ياترى البتاع ده مر على كام جيل قبل امى وياترى حتكون امى اخر الممتلكين للسن ده ولا حيروح بعد عمر طويل لاختى الصغيرة حتى لما غيرنا محل اقامتنا لتانى مره كان من اول الحجات اللى امى حرصت على انه يتم نقله معانا وجود السن ده فى بيتنا بيفتحلنا طاقة كبيرة نشوف منها بلدنا اللى بعدنا عنها سنين وكمان بيجعلنا كلنا نتخيل بلادنا اللى مشوفنهاش شكلها كان عامل ازاى السن ده زيه زى كده ما الفلسطينيين بيشيلو مفاتيح بيوتهم بعد ما تتهدم السن ده هو مفتاحنا للعوده وهو الفلاشه اللى متخذنه عليها كل ذكرايتنا وذكرايات اللى قبلنا
كل واحد منكم اكيد فى حاجه حتى لو صغيرة وحتى لو كانت مش ملموسة بتربطه بمكان اجدادنا وبلادنا القديمة اتمسكو بيها قوى وبعدكم سلموها لعيالكم نوبيتنا عمرها ما حتموت
=========
منشور فى : https://www.facebook.com/humannubia

تابعونى على