الجمعة، 31 مايو 2013

كركر السم فى العسل


زى ما عودتنا ديما القوات المسلحة انها تبث السم فى العسل وتجبرنا ناكله ونتلزز وهى بتبتسم مش لانها شبعتنا لا لانها قتلتنا كتير الناس اتكلمت عن كركر ويمكن اكون انا اخر واحد اتكلم عنها بس فى الواقع انا طول الفتره اللى فاتت كنت بدرس الكلام واوفقه مع وجهة نظرى ومع خبرتى القليلة فى الموضوع ازاى مؤسسة بحجم الق ترضخ لفئة من الشعب وتحقق حلمهم اللى عقيدتها اصلا ضده من زمان هو ده بقى الفار اللى كان بيلع فى عبى من ناحية الموضوع
 الموقع الجغرافى ووقوع كركر وسط مناطق عسكرية واماكن رمايه خاصة بالقوات المسلحة اللى بدورو بيمنع من ان يكون فى ظهير صحراوى للبلاد او كمان ان يكون فى بناء رأسى للبيوت (زى ما اهالى جزيرة هيصا محرومين من كده دلوقتى )وده اللى فعلا راعتو القوات المسلحة فى طريقة البناء للبيت بانها تعمل نظام القبب وكمان متعملش قواعد مسلحة للبيوت وان الاماكن الوحيده اللى مبنية مسلح فى المنطقة هى الجامع والوحدة الصحية  يعنى انتا محروم من اى توسع سواء كان افقى او رئسي واللى كمان بيخليك تحت العين على طول لانك فى نظرهم خاين ومعرض فى اى وقت انك تخون او (تستقل ) ده غير انو كده حقق المعضله الاكبر فى تفريق النوبيين واللى فشل فيها عبد الناصر من تسكين الكنوز فى كركر  والفاجيكات فى منطقة جديده جنب  ابو سمبل السياحى بيتم دراستها لحد دلوقتى من قبل الجهة العسكرية 
 ايه بقى العسل اللى خلطوه بالسم اللى فوق ده
كركر تعتبر منطقة كويسه من حيث بعدها عن اسوان وكمان توافر الكهرباء بشكل دائم مش زى قرى الفاو اللى موجود فيها الكهرباء عن طريق المولدات والديازل وده لوحدو كفيل انه يغرى كتير من النوبيين ده غير انه جمعهم كلهم فى مكان واحدى فى التهجير لحد دلوقتى مش كاملة المرافق

الأربعاء، 1 مايو 2013

المزيكا بتاعتنا لغتنا اللى " بنكلم بيها العالم "




كل واحد مننا بيفتخر باللغة بتاعتو والعالم كله بيتقف على غه واحده اللى هيا الموسيقي او المزيكا زى ما كلنا بنسميها والحاجه التانيه اللى مرتبطه بيها او نقدر نقول انهم مع بعض حاجه واحده هى الرقص مجرد اما تشتغل المزيكا حتلاقى عفرتها ركبك وجسمك بدا يعمل حركات لا اراديه تتناسب مع قرع الطبول وتميل مع الالات الوترية فى المسيحية حتلاقى المزيكا عندهم تضرع وتقرب للرب فى الاسلام تعتبر مظهر من الزهد فى الحياه بنلاقيها فى التصوف وفى تناغمهم حتى بالكلام واليهودية الرقص عندهم تقرب من الرب ونوع من العباده لما تلاقى نفسك بقى انتا الرائد فى اللغة اللى بتحبها او بتتفق عليها كل الناس سعتها لازم تعرف انك مختلف لازم تزيد فوق الفخر فخر ايوه انتا هنا واقف على ارض افريقيا الارض اللى سكنها بيغيرو وبيلعبو فى صوت الهوا الناس اللى بترقص حتى لو من غير موسيقى تلاقى الناس بترقص وسط الغابه على حفيف الاشجار او على صوت وقعت المطر على الاغصان لما تلاقى الابداع فى عما الالات الموسيقية من الطبيعه المحيطة تلاقى واحد قاصص بوص وعامل منه اكسليفون وتلاقى واحد جايب قرع وحاطه جوه طشتوبعزف ومتمزج وتلاقيه بيطلع احلى صوت لما تلاقى واحد جايب السلك العادى وشاده على طبله ومطلع منها طنبور لازم تتاكد انك من طبقه تانيه من البشر ايوه انتا من افريقيا ولما تلاقى الرقص بقى جوه كل بيت مش بس هزة وسط تلاقى النوبيين بيتمايلو زى موج مياه النيل تلاقى البنت بتهز صدرها وهى باصه للسما عشان تتفاخر بجمالها وتلاقى الراجل قصادها بينط من النشوه اللى وصلها من فرط الموسيقى حتى السيف اللى فى كل الاماكن استخدامه بس للحروب فى افريقا بنرقص بيه النطه الاليه اللى من كام سنه الناس كانت بتتريق وتقول ايه اللى الناس دى بتعملو هما دلوقتى بيتنططو وهمو بيسمعو التكنو والهاوس النط ده مش هبل زى ما هما بيعملو ده يدل على العزة والفخر بالمكان والزمان وفى نفس الوقت هو خضوع للموسيقى الخطوات المحسوبه بالسنتى عفرة الارض بعد النطه من غير ما توسخ الرجل حتى فى الكلام والتشبيه والبلاغه حتى فى اللغة العربية اللى هيا اصلا مش بتاعتنا فتلاقى احلى كلام فى الاغانى السودانيه لما كوبليه يرفعك لفوق فى السما من كتر الفخر زى على سبيل المثال مش الحصر " نحنا الفرع نحنا الضرع نحنا الفرع فوق فى السماء وفوق الارض نحنا الجبال "وفى نفس الاغنيه تلاقيه بيقول "من الجنوب قامت اغانى الريدا تتوجه شمال "مش شرط ان الغنى او المزيكا يكونه غزاء للروح او مرتبط بالغزل بس تلاقى الافارقة مبدعين فى سرد المشاكل عن طريق الغنا اللى اسمه RAP وتلاقى كمان بيوعى الناس لفكر سياسي زى مكان بيعمل وردى
المزيكا لو فى كل الحته الناس بتسمعها عشان ترقص وتفرح بس ف احنا عندنا الموسيقى ليها استخدامات تانيه كتير ممكن المزيكا تكون رثاء او كلام اتقال فى عزا زى اغنيه " كلمنى يا حلو العيون " اللى قالها الشاعر التجانى حاج موسى واللى كان سمع كلمتها فى عزاء لبنت قريبه وحولها بعد كده لاغنيه غناها محمد ميرغنى
كمان تلاقى اغانى عباره عن سيناريو مش محتاج لكاميرا زى اغنيه " سعاد " للعملاق الكابلى او اغنيه " طفل العالم الثالث " للاسطوره وردى والكابلى
من الاخر المزيكا عندنا هى الكلام 

نصبح على بعض باغنيه مسكاجروه ونمسى باغنيه
وتتمسو بالعافيه

 

تابعونى على