اعلان

اعلان

السبت، 28 يناير، 2012

25 الثوره

انهرده حتكلم عن الثوره عن يوم 25 يناير 2011
الى ححكيه يمكن مش كتير الى يعرفو لكن اليوم ده بالنسبه ليا كان يوم عظيم وعشان كده ححكى من قبلو قبل اليوم ده كلمت عمر صالح وابراهيم الريان عشان نشوف لو حننزل فى اسوان كان الرد من ابراهيم انو مسافر وحيحضرو فى القاهره احبط ساعتها لكن طبعنا انا وعمر صالح وبعد عناء بيان 6 ابريل بتاع ساكت ليه

ساكت ليه 







وقعدنا نوزعو وبعد كده فى مره وانا قاعد على صفحه الفيس بوك فى واحد ادمن فى جروب بعتلى درجات الحراره المتوقعه لمحافظه اسوان رحت انا رديت عليه وقلتلو بعد يوم 25 كل حاجه حتتغير لقيتو بيرد عليا وقالى انتا حتنزل يوم 25 قلتلو اكييد حنزل قالى فين قلتلو فى اسوان قالى فى واحد من حزب الوفد بينظم لليوم ده قبلها كنا ظبطنا انا وعمر صالح وجمال فاضل اننا حننزل وكمان صفحه كلنا خالد سعيد كانت حاطه رقم الحمله فى اسوان الى فى سعتها كان مع الاستاز جمال رحت قلت للى بعتلى درجات الحراره الى بعداها اتعرفت عليه وطلع ابراهيم العجمى

ابراهيم العجمى
اننا كمان بنظم لليوم ده وادانى رقمو ورقم ميسره بتاع حزب الوفد الى كان هو كمان بينظم لليوم ده من ناحيتو وعملنا اجتماع كبير لكل القوى السياسيه الى كانت اعلنت نزولها فى اليوم ده وحولنا ننسق مع مندوبينهم هنا او الافرع بتاعتهم هنا فى اسوان


ميسره
عملنا اجتماع موسع كان يوم 20 ولمينا فيه كل القوى السياسيه الى حتشارك فى اليوم ده كانو ( كفايه و حمله دعم البرادعى وشباب الوفد ومجموعه شباب مستقلين كانو اتصلو بجمال فاضل او بعمر صالح او ميسره او انا )
كان من ضمن الناس دى احمد عبد الرازق ومحى عبد الحميد

احمد عبد الرازق
محى عبد الحميد
بعد ما خلص الاجتماع واتفقنا على الخطوط العريضه على اليفط الى حتترفع واتفقنا على اننا مش حنشيل اى يفط تدل على انتمائتنا الحزبيه او الايدلوجيه بتاعتنا .
وبعد ما خلصنا نزلنا انا واحمد عبد الر ازق وعمر صالح ومحى عبد الحميد وقعدنا فى كفاتريا تحت وبدانا نصوغ بيان جديد عشان الناس تنزل معانا وحطينا فيه مشاكل الناس الى فى اسوان وبدانا نصور الورق انا واحمد عبد الرازق لاننا كنا اصغر 2 فى المجموعه وبدانا نوزع الورق اليوم ده واليوم الى وراه اول اما جينا ننزل نوزع الورق لقيت الناس بتكلمنى وتقلى ان احمد عبد الرازق بتوع امن الدوله رحولو البيت وكان كمان احمد هو الى معاها كل المنشورات قلت حنطبع منشورات تانى لكن احمد طلع ناصح وخباهم كويس لكن بتوع امن الدوله راحو يهددو احمد بس ولا قبضو عليه ولا اخدو المنشورات طبعا بيت احمد رفضو انو يطلع اليوم ده عشان كده عمر راح اخد منو الورق وابتدى يوزع هو بقى واحمد قعد فى البيت اليوم ده ولحد يوم 25 وظهرنا فجاه فى المظاهره
مكان التظاهر كان متفق عليه انو حيكون فى ميدان المحطه لكن استاز جمال فاضل كان اقترح ميدان النفق وانا كمان كنت موافق عليه لان لو حصل اى حاجه حيبقى اماكن الهرب كتيره لكن ميدان المحطه يعتبر مقفول
المهم ان الاغلبيه اجمعت على ان التظاهر حيكون فى ميدان المحطه وكلنا وفقنا على كده
ويوم 24 بليل  كان فى الاجتماع النهائى الى اتعملت فيه اليفط والشعارات وكل حاجه الاجتماع ده انا محضرتهوش رغم انى كنت فى اسوان بس انا كنت بلف على الميادين واقعد على القهاوى اشوف الناس تجاوبت مع المنشور بتاعنا ولا لا لقيت الناس عارفه ان بكره حيكون فى مظاهرات لكنهم مش حينزلو والمفاجئه لما رحت ميدان المحطه ولقيت 5 عربيات امن مركزى عند المحطه وعربيات مصفحه عند الحزب الوطنى قبلها عمر صالح كان كلم ابراهيم الريان وقالو انو يرجع من مصر لاننا حنتظاهر فى اسوان وابراهيم رجع يوم 24 وقبلتو قعدنا احنا التلاته انا وابراهيم وعمر فى ميدان المحطه وقعدنا  نهظر اننا حنتمسك بكره وقعدو يقلولى انى منزلش لان كان يوم 26 ورايا امتحانات لكن انا قلتلهم انى حنزل ومش مشكله وانا دى حتكون اول مظاهره كبيره فى اسوان كان قبلها فى مسيره صغيره مشيت فيها انا وعمر وكام واحد كده عشان احداث القديسين .
وجى اليوم الموعود يوم 25 يناير :
عندى فى البيت كانو يعرفو ان فى مظاهرات ويعرفو انى نازلها لانهم شافو المنشورات الى معايا لكن ابويا الصبح عمل معايا حركه حلوه نزلنى عشان اشترى حجات للعمال الى بيشتغلو فى بيتنا وخلانى اخد معايا اختى الصغيره عشان يضمن انى مش حزوغ منو لكن انا اخدت اختى الصغيره واشتريت الحجات ورحت على ميدان المحطه الصبح بدرى كانت الساعه 8 وشوفت الوضع هناك كان مستقر غير العربيات الامن المركزى والمصفحه الى كانت بايته من قبلها بيوم ورحت على ميدان النفق المكان التانى الى كان مقترح لقيت فى عربيتين امن مركزى واخدت اختى ووديتها البيت ووديت الحجات للعمال وسعتها كننت مجهز تليفونى المحمول عشان اصور التظاهره وكنت منزل برنامج bambuser عشان ابث المظاهرات على الهواءعشان لو حصل اى احتكاك او اى حاجه يكون عندى نسخه منها لكن سعتها البرنامج مكانش بيدعم خط موبنيل رحت اشتريت خط اتصالات وجربت البرنامج واشتغل ورحت اصور التظاهره فى الاول كان كلنا قاعدين على قهوه بعيده شويه عن الميدان كان الى قعدين هما محى وابراهيم الريان وعمر صالح اباهيم كان جايب علمين صغيرين وقالى اروح اشتريلهم ماسوره عشان نحط فيها الاعلام رحت عند اكتر من كهربائى لكن المواسير كانت كلها كبيره على العلم فى كهربائى قالى انتا عاوزها ليه رحت طلعتلو العلم قالى عشان المظاهرات قلتلو ايوه انتا حتيجى قالى يلا من هنا معنديش مواسير واحد تانى قالى تعالا ودخلنى زى مخزن وقعدنا نجرب على كل المواسير الى عندو منفعتش رحت رجعت لعمر وابراهيم الى كانو غيرو القهوه وراحو على قهوى فى الميدان كانت قهوه الجمهوريه ولقيت العدد كتر كان سعتها جى ميسره وكام واحد كده وفى واحد اتصل بيا سالنى على مكانا قلتلو على اسم القهوه راح ابراهيم زعقلى قالى انتا تعرف الواد ده قلتلو لا قالى عاوز تسلمنا يعنى رحت دحكت وبعد كده نفس الواحد ده اتصل بميسره وقالو نفس الكلام الواحد ده طلع قناوى

محمد قناوى 
وكنا قاعدين مستنين استاز جمال وبتوع كفايا استاز جمال كان قايل انو حيجو معاه ناس من كوم امبو لكن فى الاخر جى هو وبنتو واختو ومجرد ما وصل استاز جمال كلمنى وقالى انتو فين قلتلو انا موجود فى القهوه وجى فى وسط الميدان وحط الكيس الى كان في قزازه الميا وطلع العلم الكبير بتاعو وهتف رحت انا كمان قمت طلعت من القهوه وجريت على الميدان وقعدنا نهتف كلنا كان منظرنا جامد كنا عاملين لوح كتيره وملفيناش حد يشيل اللوح هههههههه فى البدايه كنا حوالى 10
انا
وابراهيم
و عمر صالح
وميسره
وقناوى
واستاز جمال
واحمد عبد الرازق
وبنت استاز جمال
واخت استاز جمال
وبدا بعد كدا العدد يزيد وظهرو بتوع كفايه
عم شينقيرى
ومصطفى باله
و دكتور هشام
واستاز احمد درويش
ومرات الدكتور هشام
ظهرو باعلام كفايا والاستيكرات بتاعتهم
والعدد بدا يزيد وجى بعد كده الحج داود وده بقى حكايتو حكايه .





الحج داود من بلانه واستاز جمال هو الى كان دعاه انو يجى المظاهره هو و الحج احمد كاجوج لكن الحج احمد كاجوج مجاش
وجى الحج داود بس كان بيجى من بلانه ويرجع بليل كل يوم فى مظاهرات فى اسوان
وفضلنا نهتف ينضملنا ناس ويمشو ناس ويصورنو بتوع امن الدوله
وسعتها ظهر خالد واستاز اسامه يوسف
الى عرفت بعد كده انهم محاميين من الاخوان المسلمين
خالد كان بيهتف بطريقه جنونيه وكان بيزعق فى بتاع امنا الدوله ويقلو " صور صور ورى لسيدك بكره الثوره حتيجى تشيلك "
واحنا كلنا بنهتف وراه
فضلنا نهتف لحد الساعه 5 وبعد ما تعبنا كلنا واتفقنا على اننا ننهى التظاهره كان احمد عبد الرازق الوحيد هو الى معترض على انهائها وسعتها زعق جمال فاضل وقال انو حيفضل فى الميدان لحدت لما كل واحد يروح بيتو ويرجع لاهلو سليم وان لو فى القاهره استمرت التظاهرات للايام الى جيا احنا كمان حنيجى كل يوم فى نفس الميعاد وهنهتف هنا حتى لو لوحدنا
ومشيت انا وابراهيم ومحى واحمد عبد الرازق وكانت معانا ايات  رحنا وصلنا ايات وبعد كده كان الاتفاق اننا كلنا حنتجمع فى حزب الوفد رحنا لحدت شارع المطار المقر بتاع حزب الوفد ورجعنا تانى على ميدان المحطه وقعدنا على قهوه فلسطين كلنا وبعد كده مشيت انا واحمد عبد الرازق على الاشاره لانو ساكن قريب من هناك وانا كنت رايح هناك عشان اخد الملزمه بتاعت الماده الى عليا تانى يوم من واحد زميلى اخدت الملزمه وروحت البيت وقعدت اتفرج على التليفزيون ومزكرتش لحدت لما شفت تفريق المتظاهرين فى ميدان التحرير وبكده انتها يوم 25 حابب اشكر كل الناس الى جت هتفت والى مهتفتش والى اتفرج علينا فى النحايه التانيه للميدان وكل الى دعالنا من البيت لانهم خلو اسوان تعيش يوم زى ده يوم حيخلد فى الذكرى الى ابد الدهر
اجل لقد كانت فى اسوان ثوره .


 


http://bambuser.com/channel/aswan.eg/broadcast/1354965


http://bambuser.com/channel/aswan.eg/broadcast/1354969



الثلاثاء، 17 يناير، 2012

حكايه بيان عمل ثوره

انا للى ميعرفنيش احمد رجب من اسوان قاع الجمهوريه ودى كانت حكايتى معاه مع من ايقظنى الى الحياه " بيان "
بدات فى مره كنت راجع مع اصحابى للبيت ف يوم الساعه 1 بليل ورايح اشرب من كولدير ميا لقيت استيكر مكتوب عليه  "معا سنغير " وعلم مصر


البيان انا كنت موقع عليه من قبلها وكنت بقنع اصحابى وعيلتى كلها انها توقع على البيان لكن انى الاقى الاستيكر ده فى قاع الجمهوريه هو ده الى مكنش متوقع كنت حموت واقابل الى لزق الاستيكر عشان اشتغل معاه وفضلت احكى لك الى اشوفو عن الاستيكر ناس قلتلى يمكن مجموعه جت من القاهره ولزقتو ومشيت وانا اقتنعت بكده لكن فى مره وانا على الفيس شوفت خبر 
http://www.almasryalyoum.com/node/128075


وكانت دى مفاجئه بالنسبالى وقعدت ادور على المدعو جمال فاضل ( هههههههه)
جمال فاضل
وفى يوم وانا على الفيس بوك بتاعى برضو لقيتو كاتب رقم تليفون الحمله وانا مكدبتش خبر رحت مكلمو وقلتلو انى عاوز اتطوع فى جمع التوقيعات اكتشفت كمان انو من كوم امبو يعنى كمان مش من اسوان المحافظه رحت قبلتو كانت فى جنينه عامه وكان قاعد هو وحوت الحمله فى اسوان ابراهيم الريان


ابراهيم الريان
قعدت معاهم وكان معايا صحبى حسن والريان قعد يشرحلنا البيان بتاع التغيير والبنود ال7 الى فيه مع انى كنت عارفها بس حسن مكانش عرفها وقعد يشرحلى ازاى نزل طرق ابواب وقالى ان شباب الحمله فى مكان حولينا بيلمو التوقيعات وحيجو كمان شويه
طبعا هما كانو قلقانين مننا وده حقهم ههههههه المهم قعدنا معاهم وفعلا بعد شويه بداو يظهرو ارجل ناس فى اسوان بدا يظهرو وحوش التغيير فى اسوان اول واحد كان


عمر صالح
عمر ده بقى كان سياسى قديم فى اسوان من اقدم اليسارين فيها يمكن حزب تجمع سابق وكمان عضو حركه كفايا يعنى راجل سياسى سياسى


والى ظهر بعدو كان


هاشم


هاشم ده بقى شاب عادى عمر هو الى ضمو للحمله بس هاشم كان مقتنع اقتناع تام بالى بيعملو بيدرس فى تجاره بورسعيد ولما بينزل اجازه بينزل مع الحمله




والى ظهر بعد هاشم وكان محطه مهمه فى حياتى هو
محمد محسن
محمد محسن هو كان كده بيضحك وهو بيشتغل وهو بيتكلم وهو بيعيش بيضحك محمد متعرفتش عليه فى بيان التغيير محمد انا اعرفو من ايام الطفوله كنا بنروح ونيجى من المدرسه مع بعض وهو كان اكبر منى بسنتين رحنا ابتدائى مع بعض واتفرقنا فى الاعدادى وفى الثانوى اتجمعنا تانى وقضينا 3 سنين مع بعض لاننا كنا بندرس فى صنايع 5 سنين محمد بعدها دخل كليه تعليم صناعى سوهاج
واتفرقنا سعتها لانى مجيتش مجموع الكليا بس كنا بنتقابل صدفه محمد كانو ملقبينو فى الحمله ب ( الجاحد ) كان بيشتغل بحماس كبير وكان حاطط فى بيتو المجلات واستمارات البيان الفاضيه وكان عندو استعداد اننا ننزل كل يوم رغم انو كان بيشتغل الصبح وشغلانه صعبا كمان اول اما الريان وجمال فاضل شفونا نعرف بعض اتطمنولى شويه او نقدر نقول اتطمنولى خالص لان محمد مكانش حاجه هينه فى الحمله محمد كان بيشتغل معانا فى اسوان ولما يروح سوهاج كان بيشتغل مع الحمله هناك كمان يعنى كانت حياتو كلها بيان التغيير  محمد اتوفى فى مسيره العباسيه الى كانت رايحه لوزاره الدفاع بتطالب بتسليم السلطه 

والى ظهر بعد محمد هما مش متذكر اسمائهم كويس بس كان واحد قريب محمد وكان واحد تانى اسمو احمد هما منزلوش معانا كتير بس مكنوش من السوابت الى بتنزل معانا زى محمد وعمر وابراهيم الريان وجمال فاضل
ومن هنا بدانا نشتغل ونشتغل على البيان

الجمعة، 13 يناير، 2012

عسكر كاذبون





عسكر كاذبون هو عرض فيلمى للى عملوه العسكر فى المتظاهرين السلميين فى ميدان التحرير والى خافت التليفزيونات انها تعرضو العرض ده لى مزايا كتير اولها انو وعى شباب الثوره انهم كانو عزلو عن المجتمع بالطريقه دى هما بيرجعو تانى للشارع لو مش بالمساعدات يبقى بانهم يورو الناس الحقيقه فكره انك تعرض افلام فى الشارع اصلا فكره روعه وكمان شبابيه خصوصا فى ظل تضليل الاعلام كل الاعلام حتى الاعلام الى بيعرض وجه نظر الثوار او بمعنى اصح بيدعى ذلك لكن هو بيوصل فكره مختلفه وسط الكلام


انا عجبانى فكره العرض وشاركت فيه وحشارك فيه تانى عرض كاذبون فى اسوان حيتعمل لتانى مره .
لو تعرفو الصعوبات الى بتوجهنا عشان ننزل نعمل عرض زى ده مجموعه شباب عجباهم الفكره مش عاوز انسى حد منهم كلهم بيتعبو واحد اتبرع بالاب توب بتاعو عشان نعرض منو الافلام للشاب المنسى دائما الى اتبرع بالسماعات وكمان بالشاشه الكبيره اينعم هى حتت قماشه بس بردو هو اتبرع بيها الى كل الى بيوفرلنا كهربا من بيتو عشان نشغل بيه الليله كلها لكل الشباب الى بيقبل الصداع الى بيعملو الجمهور من مناقشات حاده حولين دور العسكر والبديل ليه والبلابلابلا التانييين الكلام الى بقى محفوظ الى بيرددوه حزب الكنبه والاخوان والسلفييين والفلول الى البنات الى اتبرعو انهم يفهمو البنات والسيدات الى زيهم عن الى بيعملو العسكر فى الستات قبل الرجاله فى النهايا انا مبسوط لاننا بننزل الشارع تانى وبننزل كمان باقل التكاليف مقابل حاجه عظيمه بنعملها حنكمل وحننزل كمان يوم 25 بشكل مختلف فى محافظه اسوان حنواجه احنا بعددنا القليل الكتله البشريه من الشعب المغيب والقليل من الناس الى بتستعبط




كان معكم العبد لله من محافظه منسيه تابعه لمصر ووالله العظيم فيها ثوار اينعم قليلين بس بنعمل كل حاجه نقدر نعملها ......

اعلان