الأحد، 22 أبريل، 2012

صحـــبى اللى عـــدى الـــشط التـــانــى

 انا عــارف ان للناس المتابعة مدونة "المـاجيكـو" , اول ما يجيلها تنبيه ان فى تدوينــة جديدة أتكـــتب لــيه , هيغمــرهــا السعــادة لانهم هـــيقــروا حاجة جديدة  كاتبها احمد رجب ,
بس أسمحــوا لـــى أنـــى أحبطـــكم وأبهـــج نفــــسى ,
صاحب التدوينة دى " مازن علاء" , صـــاحب صـــاحبة المدونة , مش فاهمين يعنى ايه
زى ما خيرت الشاطر كدا ما "صاحب مشروع النهضة" , ومحمد مرسى الاستبن ما صحــبه

انا هنـــا مــرسى يا رجــالة, والشــــاطر هو اللى بيتحكى عنه

المهم  ايه برضه الفكرة من انى اكتب على مدونة الماجيك هقولكم بس لما ااقولكم اصلا , ازاى عرفت " الماجيك"

 أتحاد شبــاب النــوبة الديمــقراطــى , كان البداية , الاتحاد دا تقريبا كان اول كيان نوبى عامة وشبابى خــاصة يقول
للغـــولة عينك حمـــرا , الغولة هنا كانت الحكومة ورئيس الحكومة ورئيس رئيس الحكومة وابن السيد رئيس رئيس الحكومة
بدا الاتحاد شــغله  على مستوى المعارضة السياسية النوبية الواضحة للنظام من 2009 بالتحديد فى 6 أبريل , اول نزول فى الشارع للأتحــاد  , بعد كدا طلعت من الاتحـاد جمعية "نوبييون ضد التوريث" كتانى قلم شبابى نوبى ضد النظام اللى فات , كل الفعاليات دى كانت بتتنشر عبر صفحة الأتحاد  عالفيسي بوك واللى كان بيتغير عنوانها مع تغير أسم الاتحاد اللى بـــدا تحت مسمى
"اتحاد شباب النوبة" وبعديها " أتحاد شباب من أجـل النوبة"  وصولا "باتحاد شباب النوبة" ,
النااس اللى تعرف ماجيك , عارفة قد ا يه اى حاجة فيها معارضة تلاقــيه رأشق فيها , فلما ماجيك لقى كيـان نوبى شبابى بيتكلم فى اللى هو بيستهويــه , كان من اول الاعضاء المنضمين للأتحاد بعد بـروزه للنور ككيان معارض نــوبى ,  ساعتها انا فاكر , كنا بندور على شباب نوبى بايعها بالشكل اللى هو مش فارقة معاه راح أمن دولة , ولا اخد له علقة حلوة ولا ولا , الحقيقة اول ما اتعمل الاتحاد كانت الشلة اللى قايمة بالليلة عاملة زى الجــربانين كدا , بعيد عنكم  محدش كان بيجى ناحيتنا بسبب خط الاتحاد المعارض بعنف , ولما اتعملت جميعة "نوبييون ضد التوريث" اللى اتزامنت مع زيارة جمال مبارك لنصر النوبة ,واللى مجرد الاعلان عن تأسيسها أخر زيارة الوريث 24 ساعة , عشان الأمن يمشط نصر النوبة كويس خوفــا من  فاعلية كنا ناويين نعملها هناك  لما جمال يروح , بس للأسف ما تمتش عشان فلول المحــــليات قاموا بالواجب فى منجهة الزيارة للننوس

مــاجيك بـــقه كان ساعتها واحد من الناس القلايل اللى اتواصلوا مع اعضاء الاتحاد  بصفة شخصية , بعد دعوة اتنشرت على الصفحة للشباب النوبى للانضمام , كلمته انا ساعتها  بعد مناقشات سابقة على الصفحة
5 يوليو 2010 كانت اول رسالة مابينى وبينه , اتكلمنا ساعتها عن اللى كان داير , لترشيح نوبيين لمجلس الشورى , هو كان فى دماغه شخصية معينة وانا عارضته فى اختياره وشرحت له الاسباب اللى كانت عند الاتحاد عامة
بعد كدا اتبادلنا التلفونــات وبقينا نكلم بعض بداية كان الكلام عن تكوين مجموعة للاتحاد فى اسوان , واللى هو  أستعد يبتدى مجموعة هناك , خصوصا انه كان راشق فى ايى حاجة فيها سياسة فى اسوان , بس تلفون جاب تلفون وبينهم فى الوسط رسايـــل
مرة يسأل مين البنت اللى لسه منزل صورتها دى ,  مــــرة نتكلم على اغنيـــة , طب ايه مش عايزين كركديه لمــا اجــى ,
من هنـــا بدأت فعلا صحوبية بجد , بعيد عن شغل الاتحـــاد فى العيد الكبير اللى جيه فى 2010 المفروض كنت اشوفه لما اجى اسوان
انا روحت اسوان وكلمته , كان حاطط كول تون ساعتها بتاعت "ووه نور الحمد لله" , انا اول مرة اصلا اسمع الكول تون دا سمعته على تلفونه , أول ما رد , قولت له انا عايز أسألك حاجة , انت ازاى عملت الكول تون دا , شرح لى مفهمتش قالى خلاص لما اشوفك , سالته انت فين , كان ساعتها هو راح توشكــى فى البلد كان عنديهم فرح , وانا ساعتها كنت بقضى العيد فى أسوان المدينة , مابين الخطارة وغرب أسوان ,
المهم لما البرنس رجع , كنت انا رجعت ساعتها تهجير توماس وعافية اللى فى أسنــا ,
ومن هناك سافرت لمصر من غير ما اشوفه , كل واحد فينا يتصل بالتانى يا عم انت فين , انا فى المكان الفلانى وانت لا انا فى المكان دا
وكل واحد يقعد يرمي على التانى انه السبب اننا ما اتقبلنــاااش

لحد ما جـــيه المعلم هنـــا , بعدها بكـــام شــــهر مش فاكر تصدقوا اصلا غربة اللقاء الاول دا
مش فاكر اصلا شوفت اول مرة ازاى , فعلا والله مش فااكر
كــان معـــاه أبــراهـــيم الريـــان ( دا كمــان حد ملوش حل بس خســـارته , جعفرى ياعينـى)
D:
بس فاكر انه من ساعتها , بقه فى حد صحــبى اوى اسمه الماجيك , صحيح البداية كانت معرفة فى عمل سياسى وكدا , بس اللى تم من ساعة المعرفة دى اتحول فعلا لصحوبية جامدة ,
العيد الكبير اللى فات كان فعلا من اجمل الاعياد اللى قضيتهــا , الفكـــرة انى عرفت اعمل مزج مابين اصحـــاب عزاز ليــا من أسوان
ومابين اصحابى الجداد لو قسنـــا بالزمن ( الماجيك , حمــادة حداد) , وتعامل دول مع دول , وكلام دول مع دول , حسيت انى فعلا حمادة والماجيك اضافة قيمة جدا لعــالمـــى , وقضينـــا أحــلى تالت يوم عيد فى الدنيـــا , عند مئذنــة بلال  , جنوب خزان أسوان
واللى اصــــر واحد من اصحابــى ساعتها انها مكان دابود القـــديمـــة
"حيث رفع اول دابـــودى الاذان"
D:

بعدها بكاام شهـــر نـــزل هنـــا مــصر , الفترة دى ما طولش ,
شــــوية ودخـــل فى حـــوار الورق عشـــان الجيش
وفـــيش ثـــلاثـــى ,  وروح للبندر وتعـــالى من البنــــدر , وخد جوابك

حضــــر نفـــــسك تســـافر قنـــا ( 3 ساعات) طبعا بتسافر الفجر عشان توصل الصبح تروح منطقةالتجنيد ,
اول ما تدخل بقه عندهم تقعد تكع يامعلم فى فلوس ,
مش عارف كتيب ايه " شرف الجندية" , وبون تصــوير ,ومش عارف ايه
وخش خلص الكانتين المهم الزيارة لاى مركز تجنيد , بتكلف الواحد على الاقل خمسنايــة معتبرة

الماجيك عدى بالتجربة دى الزيارة الاول وبعدها بكام اسبوع هما بيحددوه ,

وبعد كدا لما راح عرف انه دخل الجيش
كلمنا انا وحمادة حمدى
انا فاكر اليوم دا كان بايخ علينا ازاى

حمادة كتب فى الفيس عنده
" ايه الاومليت دا
الماجيكو دخل الجيــش"
وانا كتبت
"ستظل مدنيــا فى عيونـــا يا ماجيك"

الماجيك دلوقتى فى مركز التدريب

رايح له باذن الله الجمعة الجاية

مش عارف فكرة انه هنا قريب من القاهرة ذاتها بتصبر الواحد

سنة فل عليه باذن الله ويقضيها , زى ما غيره قضاها


اللى خلانى اخد الباسورد منه
انه فيى يوم 18 ابريل يوم التدوين النوبى
كنت حابب ان تدوينتــى تتنشر عند الماجيك
فى مدونتــه
كان المفروض هعملها وابعتها له ينزلها عنده
بعد كدا انا اتاخرت وهو كان راح الجيش

سابلى الباسورد بتاعه والايميل واخــرى شوية
كنت ساعتها انا عملت مدونة
بس مجرد انـــى بكتـــــب هنا فى مدونة بتاعت
"المـــاجيكــــو"
مــــــاتعرفوش دا حـــــــــاجة
بسطــــــــــــــــــانى ومفــــرحـــــــــــانى قد ايه

واحشــــــــــــــــــــــــنى فعلا يا فقـــــــرى

ملحوظــة هامة :
دى تقريبا اول تدوينة تنزل فى مدون " المكان االمظلم" ويكتب فيها كلمة
"هكذا" بحرف الذال وليس الزين
زى ما عودنــا المــاجيك , اللى ياما عانينا معاه
واحنا بنفك طلاسم كلماته وبنستلذ واحنا بنعمل كدا

الأحد، 15 أبريل، 2012

ا ل ن و ب ه


" ا ل ن و ب ه " 
انها ليسه عباره عن كلمه من مجموعه حروف انها وطن يسكننا ويتحكم بكل جوارحنا انها حياه نستمتع بها,, فكما كرم الله الرسول محمدا ليكون خاتم النبيين فلقد كرمنا لنكون نحن النوبيين .


اجل انه النوبى ذلك الانسان القادر على تحويل الصحراء الى جنه خضراء تعم بالحياه والامل لم ارى بلدى القديمه ولا مره لكن من حكايات والدى وجدى انها كانت عباره عن الجنه فى الارض
اللعب فى المياه والجلوس وقت الغروب على الشاطئ الساحر تخيل نفسك وسط اهلك ولا غريب بينكم ولا حقد ولا غيره فالكل للكل انها المدينه الفاضله
ورغم قساوه التهجير وبشاعته الا ان النوبيين استطاعوا ان يجلبوا الحياه معهم اينعم بفروق بسيطه بس كانت روعه.

 عشت فى شارع كلهم اهلى اطلع من بيتى الصبح رايح على الحضانه كل الاطفال الى فى سنى والى اكبر منى بنطلع فى نفس الميعاد نروح على المدرسه كلنا مع بعض ونضحك ونتكلم طول الطريق لحد المدرسه الشعور الى كنت بحسه فى الايام دى عمرى ما حنساه رغم صغر سنى الا انى فاكر كل المشهد ده وانا رايح وانا جى من المدرسه فى عز الظهر بنمشى من ظل شجره لظل الشجره التانيه لحد ما كل واحد يوصل لبيته انتظر حتى قرب المغرب  ليعود والدى من العمل لقد كان يعمل فى اسوان وهذا كان سبب فى انتقالنا للعيش فى اسوان وانقطاع هذه الاحلام التى كنت ابنيها فى البلد .
مش حنسى كمان قبل العيد وتلييس البيت بالطين عشان يكون شكله حلو وتزيين البيت وكنس الشارع وكمان يوم العيد الى تلاقى فيه كل البلد فى الشارع بتعيد على بعض بعد الصلاة الى بتكون فى الخلاء وبعد الصلاة بيتلموا كل اللى من سن واحد او اصحاب عشان يلفوا مع بعض ونعيد على كل البلد بيت بيت منسيبش حد فى اليوم ده الا لما نسلم عليه وبعد ما نخلص نتلم كلنا عشان ناكل "المديد" فى بيت واحد فينا .
احنا سبنا البلد وانا عندى 6 سنين بس كل الاحاسيس الى كنا بنعيشها موجوده جوايا .
انتقلت للعيش فى المدينه وجرتنى مشاغل الحياه وخلتنى منزلش البلد الا فى المناسبات وكمان فتره بقائى فى البلد متزيدش عن اسبوعين .

لكنى كنت بستنى الفتره الى انزل فيها البلد بفارغ الصبر حتى لو حقعد يومين وكنت بجهزلها من قبلها باسابيع .
انا نفسى ارجع بلدى الى حكالى عنها جدى وابويا نفسى ارجع للمدينه الفاضله ...


النص التانى للموضوع حيكون عن بعض الاتفاقيات الدوليه الى بتلزم مصر بعوده النوبيين الى اراضيهم الاصليه وبعض الاحصائات عن التهجير عامه
طبعا معظمكم عارفين ان التهجير تم بين 1963 الى 1964 وكان عدد المهجريين ساعتها 17 الف اسره دول الى تم تهجيرهم فعليا
كمان كانت فى اسر مغتربه ودول الى مكانوش مقيمين فى البلاد النوبيه بصفه دائمه ودول كانو 8 الاف اسره وده يمكن كان اخر تعداد حقيقى تم للنوبيين حتى الان .
التهجيرانتهى فى 1964 المشكله بقى ان وعود الحكومه كانت ان الحكومه حتكون موفره كل حاجه للنوبيين والى حصل العكس  فيه النوبيين اللى حالفهم الحظ فى انهم يلاقو بيتهم مبنى وفيه الى محالفهوش الحظ ولقى بيتو عباره عن حدود مرسومه بالطباشيير
كل الكلام الى كانت بتقوله الحكومه فى الفتره دى كان مخلى النوبين بين نارين بين انهم يسيبو جنتهم وبين انهم يروحوا فى الحداثه المياه والكهربا فى البيوت زى ما كانت وعود الحكومه فى الفتره دى
فى كتير من النوبيين قبلوا انهم يروحو وادى كوم امبو عشان ولادهم يلاقو التعليم والصحه والنور فى كل مكان لكن لما راحاو صدموا الصدمه الفظيعه تم تسليم الاراضى الزراعيه للمهجرين سنه 71 يعنى بعد 7 سنين من التهجير .
تخيل بقى 7 سنين قاعد فى صحراء انتا وبهايمك  سعتها مكانش قدام الناس الا حلين يا يشتروا القش من دراو او يذبحو البهايم الى كانت معاهم والافظع من ده بقى انهم راحو ملقوش مياه فى البيوت ولا حتى فى القرى حيث تم توصيل المياه للبيوت فى 85 يعنى بعد21 سنه كانت فى البدايه المياه بتيجى مره كل يومين عن طريق حوض كبير فى بدايه كل قريه بيتملى بيستخدموه العمال الى بيبنوا باقى البيوت الى ما اتبنتش وكمان بتاخد منه الستات الميا عشان توديها للبيوت الى عاوزه ميا للشرب وللطبخ وكده بس الاوضاع بدات تتصلح خصوصا بعد ما عملوا مشربيات عموميه فى الميادين الرئيسيه فى البلاد وكمان مشروع ترعه وادى خريط طبعا ولان مكانش فى مياه اصلا مكانش فيه صرف صحى واللى لحد دلوقتى اصلا مفيش صرف صحى والناس بتستخدم الطرنشات اما عن الكهرباء فكان فيه مولد واحد بيخدم قرى التهجير وكان ليه جدول كل يوم فى بلد وكل بلد بينور فيها شارع وميدان والعيال كانت بتشتغل زى الرحاله عشان تذاكر تحت النور
لحد ما تم توصيل الكهربا الى البيوت بعد 1976 وبدا النوبيين فى اعمار المنطقه الى تقريبا الحكومه وقفت مشروعات التنميه فيها او عطلتها بمعنى اصح
فى التالى بعض الاحصائيات للوضع الحالى بالنسبه للنوبيين او مركز نصر النوبه :
المرافق العامه :

لنقاط الشرطه هما 4
وحدات اسعاف 4
مركز شرطه 1
وحدات مطافى 2
مكاتب البريد 43 مكتب موزعين فى القرى لكن مش كلهم الى بيعملو بالكفائه الكامله
الوحدات المحليه 8
الوحدات الصحيه 43 فى وحدات منهم من غير اطباء ومغلقين تماما
السنترالات العموميه 4 لكن مش كلهم يمكن تحصيل فواتير التليفونات فيها
مكاتب التومين 3 فى عنيبه وبلانه وكلابشه
ادارات التومين 1 مركز ناصر
بيوت الثقافه 3 توشكى وكلابشه ونصر
اداره اوقاف 1 فى مركز ناصر
قطاعات الاوقاف 3 فى عنيبه وكلابشه ونصر النوبه
وحدات بيطريه 3 فى توشكى وبلانه
اما عن الجانب التعليمى :
ادارات تعليميه 1
قطاعات تعليميه 3
مدارس ابتدائى 45
مدارس اعدادى 31
مدارس ثانوى عام 4
مدارس ثانوى فنى 6

طبعا كلنا عارفيين ان عمليه التهجير لم تكن بطريقه مدروسه جيدا او محسوبلها سلفا ومن الاثار المترتبه على ذالك هى عمليه الاحلال الجزئى او الكلى الى بتتم للبيوت لان التربه غير صالحه للبناء وطبعا بعد التهجير مباشرة او بفتره قصيره ادى ده الى انهيار بعض البيوت
فيما يلى بعض الاتفاقيات الدوليه التى تلزم مصر بعوده النوبيين :
 



19.20جبر ما يتكبد من ضرر

اعلان الامم المتحده بشان الشعوب الاصليه الماده 10

اعلان الامم المتحده بشان الشعوب الاصليه الماده 26

اعلان الامم المتحده بشان الشعوب الاصليه الماده 8

الاعلان العالمى لحقوق الانسان الماده 17

العهدين الدوليين الخاصين بحقوق الانسان الماده 16..17

العهدين الدوليين الخاصين بحقوق الانسان

جبر ما يتكبد من ضرر الماده 18

الخميس، 12 أبريل، 2012

اسبوع فارق فى الحياه

بعيدا عن اختلافى مع المنظومه فى طريقه ادارتها للبلاد وايضا فى طريقه ادارتها لنفسها ولانى قلتها قبل ذالك انها اكبر دليل على قمع الحريات .

بعد اسبوع من الان ستتغير طريقه حياتى سوف اتخلى عن اشياء اساسيه فى الحياه وافعل اشياء كثيره رغم عن انفى كم سيكون ذالك مؤلم لشخص اعتاد ان يمارس الديموقراطيه والحريه على نفسه قبل من حوله اسبوع وستكون للحياه طعم اخر غير هذا المزاق الحلو الملئ بالنشوه والتشويق اسبوع وستكون الحياه جدول مرسوم لمده عام روتين يبعث الملل فى كل الاركان عام سيمر على من الان لا يحسب من عمرى عام اخذ منى عنوه عام قامع للحريات فى اول مرحله للتناحر بينى وبين الحكومه المصريه واعنت نظام بداخلها القوات المسلحه كل ما اعلمه عن ان الحياه بداخله عباره عن اوامر تطاع طاعه شبه عميا اذا فهى حياه اخرى ففى حياتى الان ايضا اطيع الاوامر ولكن اطيع اوامر عقلى الذى اعيش معه فى تناغم مستمر ولكن الان سوف اطيع اوامر بشر غيرى طريقه تفكيره مختلفه حياته مختلفه لذالك فان الصراع بينى وبينهم سيكون حتميا ومسلم به وسيربح من يملك انشف دماغ واعتقد انه ليس انا.
ايضا بالنظر الى حياتى المجتمعيه هل قدر لى القدر هذا الشئ ان ابعد عن من عاشرتهم لفتره مثل هذه انه عام باكمله تتغير فيه الوشوش والطباع والحياه باكملها سواء فى ام فيهم لا اخفى عليكم شئ اخشى ان اعود من هذه الرحله لا اجد نفسى ولا اكد من حولى وهذه اكثر ما اكره فى هذه الحياه ان افقد انسان حتى لو كان ما يربطنى به هو مجرد نظره فى اعيننا لبعضنا الاخر فكيف اتاقلم مع الحياه فى الداخل واصادق فيها اشخاص اعلم ان كل ما يربطنى بهم سوف يزول فى مده محدده لماذا قدر لنا ان نعيش هكذا غرباء .
اجل سافتقدكم يا هذه الحياه على امل ان اعود لاجد انه لا تغيير سوى القليل .
ارجوكم لا تجعلو يفوتنى شئ من هذه الحياه
لا تفعلو الكثير حتى اعود اليكم
الى اللقاء
سافتقدكم 

الثلاثاء، 10 أبريل، 2012

عفوا انا نوبى

بالامس كنت مع الاستاذ ابو العز الحريرى اثناء زيارته لمحافظه اسوان وما جعلنى اذهب مع الاستاذ الا التزامى الحزبي ليس اكثر واثناء عودتنا من احدى القرى النوبيه عنيبه تعمدت الجلوس بجوار الاستاذ حتى اساله عن البرلمان والمجلس التاسيسى للدستور وحكم بطلانه وكان هذه مجرد فتح حوار للموضوع الاساسى للنقاش وهو طرح موضوع التعدديه الثقافيه فى الدستور المصرى وهذا الحق الاصيل لى ولابناء عمومتى من النوبيين والذى قوبل ببعض الرفض من الاستاذ وقال ان كل ما نريده فى الدستور هو عدم التمييز لا على العرق والدين واللون وعندما تسالت ان هذا البند غير الزامى للحفاظ على التراث النوبى رد على الاستاذ بانه هذا اقصى ما يمكن فعله واستطرقت بعد ذالك الى الحديث عن ان اذا تم اعاده انتخاب اعضاء فى الجمعيه التاسيسيه من جديد هل بإستطاعته مساعدتنا فى تذكيه او انتخاب بعض الرموز النوبيه لتمثيلها فى التاسيسيه خصوصا ان النوبه ليس لها تمثيل الا بفرد معين وليس من حقه الانتخاب بناء على الاعلان الدستورى قال لى انه لن يشارك اذا تم ذالك بالفعل وسيعلن رفضه التام لانتخاب الجمعيه التاسيسيه من اعضاء مجلس الشعب الذى يمثل فى الاخوان والسلفيين فسالته هل هذا هو رايه ام ان الحزب متبنى تلك الفكره قال ان الحزب بجميع اعضائه فى البرلمان سيتبنون تلك الفكره انهيت الحوار عند هذه النقطه 
وجلست افكر بمزيد من العنصريه .
* وضع الاستاز فى الحديث لم يكن يعجبنى حيث انه كان يتكلم عن مضض خصوصا فى بدايه الحديث عندما عرفت نفسى بانى احمد رجب نوبى وعضو بحزب التحالف فقال لى " يعنى جنسيتك ايه " قلت له بكل فخر جنسيتى نوبى  لم اكن اعلم هل كان من باب المزاح ام انه يقلل من شانى كونى صغيرا فى السن فى الحالتين انا لا ارضى بذالك
* انا لست فى الامانه العامه للحزب ولكنى لا اظن ان يكونو ناقشو بالفعل موقفهم من الجمعيه التاسيسيه للدستور خصوصا ان حكم بطلانها كان فى نفس يوم لقائى بالاستاذ وايضا انه لم يخبرنى احد من امانه اسوان بمثل هذا الشئ
* اعلم انه من واجب الوطنيه يرفض الاستاذ ابو العزالحريرى ان يملك انتخابات التاسيسيه للسلفيين والاخوان ولكن هذا ما سوف يحدث بمقاطعته لها خصوصا وان هذا صلب الاعلان الدستورى

فى النهايه كلمه موجهه الى الاستاذ ابو العز الحريرى يصفته الشخصيه والحزبيه والى حزب التحالف 
عفوا انا نوبى وافتخر بذالك

الأحد، 1 أبريل، 2012

الورده الى بينى وبين مصر


حرجع انهرده اتكلم عن مصر مع انى كنت قلت انى مش حتكلم عنها تانى فى البوست الى فات
حتكلم عنها لانى اكتشفت ان فى حجات فعلا ربطانى بمصر وحاجه من الحجات دى هى دم اخويا محمد محسن 
محمد كان اخوا ورفيق دربى ومصبرنى على صعوبه سيرى فى الطريق السياسي المصرى وكمان هو السبب فى معلومات كتيره فى دماغى لانو فعلا كان مثقف وملتزم جدا هو الى كان بيقيمنى ويقولى ده صح وده غلط محمد ببساطه برغم فرق السن البسيط محمد كان ابويا واخويا الكبير فى السياسه محمد كان الدينمو بتاعنا محمد كنا كلنا مسمينو الجاحد محمد بصراحه كان بيقاس بيه مستوى النشاط السياسيى فى اسوان بعد الثوره مجرد سفره لسوهاج عشان يكمل دراستو فعلا السياسه كانت بتنام فى اسوان
انا ومحمد اتربينه مع بعض كنا مع بعض فى المدرسه هو اكبر منى بمرحله بس اخوه الاصغر منو احمد كان فى كل مرحله معايا جنبى فى الدرج الى ان افترقنا فى المرحله الثانويه احمد يروح الثانوى وانا اروح الصنايع واروح الصنايع الاقى محمد هناك وترجع الصداقه القديمه اكتر من الاول لحد ما محمد يجيب المجموع العالى الى انا مقدرتش اجيبو عشان نروح نفس الكليا الى هو راحها ف انا اكمل دراستى فى اسوان وهو يدرس فى سوهاج الى نزول البرادعى مصر وبدايه الجمعيه الوطنيه للتغيير وبدايه حمله معا سنغيير ولما قدرت بصعوبه اتحصل على رقم الحمله فى اسوان واروح اقابل المسؤلين عن الحمله ف الاقى محمد محسن سابقنى وبينزل معاهم شغل فعلا
وتمر الايام وننزل شغل مع بعضلما يكون موجود فى اسوان ولما يسافر يشارك مع الحمله فى سوهاج
لحدت لما سفرنا مع بعض فى اعتصام 8 يوليو.
سفرنا من غير حجز تخيلو من اسوان الى القاهره بين عربيات القطار عشان نلاقى مكان نقعد فيه وبعد ما وصلنا نزلنا على الميدان
واستمرنه فى الاعتصام لحد ما اتطريت انى ارجع على اسوان لظروف اسريه واستمر محمد هناك لحد ما جت مسيره العباسيه (وزاره الدفاع )
واعتدو بلطجيه الشرطه العسكريه على المتظاهريين محمد اتصاب بطوبه فى راسه فى المسيره ولانى كنت فى اسوان كنت بتابع معاهم المسيره لحظه بلحظه بالتليفون والتويتر والتلفزيون اول اما سمعت ان هو اتصاب كلمتو هو كان كل الى بيقولو اصابه خفيفه خير ان شاء الله يمكن كنت الوحيد الى سمعت صوته قبل ما يتخل فى غيبوبه بعد ما سمعت وضعو تانى يوم حسييت بصدمه شديده بس كنت متفائل خير كنا كل الى بنتمناه ان محمد يرجع تانى يمشى معانا فى الشوارع نسمع ضحكته الى بترج المكان نلاقى حد يحمسنا ويشد على ايدنا وكنا كل اما نيجى نتقف على نشاط نقول استنو نسال محمد ربنا يرحمك يا محمد .
انهرده عيد ميلاده كان ممكن يكون وسطنه بس كلنا عرفين مين الى سلب مننا الدحكه والحياه
المجلس العسكرى
لحد دلوقتى محمد الدوله ما اعتبرتهوش شهيد الفكره مش فى التعويضات او فى معاش شهرى رغم ان ده مش عيب لان محمد كان بيساعد فى مصاريف اسرته لكن عشان اسم محمد ياخد حقو وده الى انا متاكد منو موت محمد قوبل بتجاهل حكومى شديد رغم ان الى استشهدو بعد محمد فى محمد محمود او فى غيرها احتسبو من الشهداء وكمان الى استشهد قبل محمد فى 18 يوم بردو احتسب شهيد

بعد ايام قليله من الان حكون جندى فى القوات المسلحه مش عارف ازاى حلبس زى زى الى كان لبسو واحد كان السبب فى موت محمد او ازاى حاخد اوامرى من واحد زى ده او ازاى حكون عضو فى منظومه خزلت مصر كلها وده كان اعتراضى على التجنيد من البدايه مش خوف من حاجه لانى فعلا كنت بخدم مصر بكل ما اوتيت من قوه برفقت اخويا محمد لكن انى اكون فى منظومه فاسده زى دى هو ده الى حيكون صعب عليا فعلا ربنا يصبرنى عليهم ويعدى فترتى على خير وبسرعه 

" وتارنا مستمر ويسقط يسقط حكم العسكر "